2-3 tilde oqutılğan yigirmi mektep bilgisayarlarnen taqdirlendiler

28 May 2013

Qırımnıñ yigirmi mektebi yigirmi bilsayar aldı. Yañı tehnikanı eki-üç tilde oqutılğan, qırımtatar sınıfları olğan rus tilli mekteplerde qırımtatar tili ve edebiyatı sınıf odalarına paylaştırdılar.

Şunı qayd etmeli ki qırımtatar halqına qırımtatar tilini inkişaf ettirüvde yardım bermek teşebbüsinen Qocaeli (Türkiye) qırımtatar medeniyet ve yardımlaşma derneginiñ başı Vefa İbraim Aracı çıqıp, onıñ muracaatına Qocaeli şeeriniñ valisi Ercan Topaca qoltuttı ve Qırım mektepleri içün bilgisayarlar alınmasına sermiya ayırdı.

Qocaeli derneginiñ vekilleri bilgisayarlarnı alıp “Maarifçi” birleşmesine berdiler.

Keçken eki afta devamında “Maarifçi” birleşmesiniñ azaları Qırımnıñ şeer ve rayonlarında olıp. Sudaq, Keriç, Kefe, Aqmescit, Saq ve İslâm-Terek rayonlarındaki 2-3 tilli mekteplerge alıp bardılar.

Aqşeyh, Qarasuvbazar, Canköy ve Seytler rayonındaki mekteplerniñ vekilleri bilgisayarlarnı mayıs 27 künü Aqmescitte aldılar.

“Tehnika tasil bölükleriniñ tezkereleri esasında berilip, mektepniñ balansına bedava keçirile. Bilgisayarlar qırımtatar tili ve edebiyatı odalarında yerleştirilip, olardan mektepniñ epsi talebe ve ocaları qullanabilirler”, – dedi “Maarifçi” birleşmesiniñ reisi Safure Kacametova

“Evelden keregi kibi diqqat ayırılmağan 2-3 tilli mektepler içün bu yardım pek müim. Rus tilli mekteplerde tasil alğan qırımtatar talebeleri aqranları kibi internetten qullanalar ve araştıruv işlerinen oğraşalar. Bu yardım olarğa em oquvda, em qırımtatar tilinde bilgilerini pekitüvde faydalı olur”, – dep qayd etti Safure Kacametova.

Qırımtatar tilinde tasilge büyük emiyet bergen Milliy Meclis reisi Mustafa Cemilev Qocaeli şeeriniñ valisi Ercan Topaca ve Qocaeli (Türkiye) qırımtatar medeniyet ve yardımlaşma derneginiñ başı Vefa İbraim Aracığa qırımtatar tili ve edebiyatı odalarınıñ maddiy-tehnikiy bazasını pekitkeni içün teşekkür bildirip, bu işniñ devamı olacağına ümütini seslendirdi.