Mustafa Cemilevniñ Almaniyada İslâm Cemiyetleri Milliy merkezinde körüşüvi

03 May 2013

Frankfurt Maynda Qırımtatar halqı Meclisiniñ reisi Mustafa Cemilev Almaniya Türkler federatsiyasınıñ baş kâtibi Şentrük.Doğruyol ile körüşti. Mezkür federatsiyanıñ AlmaniYada 300 bölükleri ve birleşmeleri mevcuttır.

“Ukrainada bugünde-bugün Mecliske nisbeten munasebet – pek yañlış ve ögü qapalı bir siyasiy pozitsiyadır. Ukraina akimleri Avropa Birligine qatılmağa istegenlerini bildireler, amma aynı zamanda qırımtatarlarnıñ vekâletli organına ve onıñ yolbaşçısı, bizim ğayet ürmet ettigimiz reisi Mustafa Abdulcemil Qırımoğluna bizge añlaşılmağan sayğısızlıq köstereler.

Albu ki, er keske malüm olğanı kibi dünyaca meşur sovet uquqqoruyıcısı Mustafa Cemilev ve onıñ reberligindeki Meclis Avropada demokratik degerlikler ve zorluqsız küreş institutı olaraq tanılğandır”, – dedi Şentrük Doğruyol

Almaniya Türkler federatsiyasınıñ baş kâtibi Ukraina akimlerine Qırımtatar halqınıñ Meclisi ve onıñ reisi Mustafa Cemilevnen acele sürette dialog qurmaq teşebbüsinen çıqmalılar, degen fikirni seslendirdi. Ş.Doğruyol emin ki, devamlı qonuşuvlar mahsuldar işbirlikke alıp kelerek, Ukrainada barışıq ve bollulıqnı teminler.

Dialog devamında taraflar kelecekteki özara işbirlikni kenişletmek ve pekitmek şekilleri ve printsiplerini tafsilâtlı muzakere ettiler.

Soñra Kerpende (Şimaliy Reyn toprağı-Vestfaliya) Mustafa Cemilev musulman dünyasınıñ meşur erbabı, Almaniya musulmanlarınıñ liderlerinden biri, İslâm Cemiyetleri Milliy merkeziniñ baş kâtibi Oğuz Üçünçü ile körüşti. Subet devamında Oğuz Üçünçü Qırımda ukrain akimleriniñ Qırımtatar halqı Meclisine nisbeten menfiy areketleri ve bunıñ sebebinden yarımadada kerginlik meydanğa kelgeni hususındaki haberlerden kederlengenini ayttı. Onıñ fikrince Qırımtatar halqı milliy idare organı ve Qırım tamır halqınıñ aqlarını tanımamaq Avropanıñ bir qısmı olmağa tırışqan devlet içün iç te kelişmegen bir aldır.

İslâm Cemiyetleri Milliy merkeziniñ baş kâtibi Oğuz Üçünçü emin ki, devlet ve cumhuriyet ükümetleri siyasiy irade kösterip, bölünüvden dialogğa keçmek borcludır.