Qırımtatar halqı iç bir zaman bölünmez

23 Mart 2012

2012 senesi mart 22 künü Aqmescit şeerindeki Kiyev rayon mahkemesiniñ binası yanında Qırımnıñ çeşit yerlerinden kelgen 2500-den ziyade qırımtatarı toplandı.

“Endi çeşit-türlü siyasiy boyalarğa kirip çıqqan, menlikke urulıp, edepsiz davranğan bazı semetdeşlerimiz tarafından kene halqımıznı bölmek oğrunda yañı areketler başlağanlarını eşitip, mahkeme binası qarşısında toplanmağa qarar berdik”, – deyler mında bulunğan semetdeşlerimiz.

Toplanğanlar arasında qırımtatar halqı areketiniñ veteranları ve gençler pek çoq olıp, olar bilhassa Ruslan Balbek aqqında keskin sözlerni ayttılar. Yaqın vaqıtlardan berli bu insannıñ adı qırımtatarlarnıñ milliy urf-adetlerine, umumiy qaidelerge zıt olğan pis qılıqları, kösteriş içün yapqan areketleri neticesinde er keske belli oldı.

Bu sefer, Ruslan Balbek Qırımtatar halqı Meclisiniñ reisi, Ukraina halq deputatı Mustafa Cemilevge, bunıñ kibi de Bütünukrain “Den” ve qırımtatar “Avdet” gazetalarına nisbeten “namus, şeref, iş itibarını qorçalav ve aqiqatqa uymağan malümatlarnıñ reddiyesi aqqında”dava açtı.

Bergen arizasına köre davacı Meclis reisi Mustafa Cemilevniñ “Den” gazetasınıñ mühbiri Nikolay Semenağa bergen “Mustafa CEMİLEV: Rusiye mahsus hızmetleri Qırımnıñ yönelişi deñiştirilmesini qırımtatarlarnı parçalamaqtan başladılar” serlevalı intervyüsında seslendirilgen bir sıra fikirlerni kendisi içün aqaretleyici, dep bile ve mahkemeden olarnıñ yalan olğanını belgilemekni talap etip, körgen “maneviy zararı” içün 30 000 grivnâ ödenilmesini soray.

Açıq mahkemede iştirak etüv aqqından faydalanmaq içün kelgen bu qadar insannı mahkeme salonı sığdıralmaycağı sebebinden, içeri 10 vekil kirdi. Qalğanları ise tışarıda beklep qaldılar.

Lâkin, Kiyev rayon mahkemesiniñ akemi Didenko A.D reisligindeki birinci açıq toplaşuvğa R. Balbekniñ kendisi kelmedi. Sebebi – onıñ Regionlar partiyasından saylanğan D.A. Şentsevniñ göñülli yardımcısı sıfatında Qırımdan tışqa komandirovka ketkeninde. Mahkeme işi boyunca cevapkârlar vekilleriniñ ricasınen akem Didenko iş vesiqalarına R. Balbek aqqında Mustafa Cemilev aytqan sözlerniñ kerçekligini isbat etken bir sıra vesiqalarnı qoştı. Kiyev rayon mahkemesiniñ akemi D.A. Didenko seslendirgen qararı boyunca davacı toplaşuvğa kelmegeni sebebinden mahkeme 2012 senesi arpel 9 saat 15 00-ge qaldırıldı.

Kiyev rayon mahkemesiniñ toplaşuvı bitkenini beklegen biñlernen insan Qırımtatar halqı Meclisi ve onıñ yetekçisi Mustafa Cemilevge qoltutaraq “Mustafa”, “Meclis”, “Vatan”, davacı Ruslan Balbekniñ adına ise “Masqara” dep qıçırdılar.

Mahkeme etrafında toplanğanlar ögünde Qırım musulmanları diniy idaresiniñ başı, acı Emirali Ablayev, qırımtatar halqı milliy areketiniñ veteranı Arsen Alçikov, Meclis reisiniñ birinci muavini, Qırım Yuqarı Şurasınıñ deputatı Refat Çubarov, Bağçasaray regional meclis reisi Ahtem Çiygoz çıqışta bulunıp, R. Balbek ve onıñ kibileriniñ areketlerine qırımtatar halqınıñ birligini parçalamaq kibi qıymet kesmek kerek, dediler.

Qırımtatar halqı aqlarınıñ ğayrıdan tiklenmesine qarşı çıqqanlar bu sefer öz menfaatlarına evelden Qırımtatar halqı Qurultayınıñ qararlarına qarşı çıqqan ve şunıñ içün de qırımtatar halqı tarafından qabul etilmegen, şu cümleden 2010 senesi oktâbr ayında Qırım Yuqarı Şurasına ve yerli şuralarğa saylavlardan keçalmağan kimselerni qullanmağa tırışalar.

Çıqışlarda qayd etildi ki, qırımtatarlarğa qarşı küçler tarafından doğrultılğan bu areketler Qırımtatar halqınıñ öz Vatanında aqlarını ğayrıdan tiklev, onıñ Ukrainada telükesizligi ve inkişafını teminlev boyunca keçirilmesini bir çoq devlet ve halara teşkilâtları maqullegen halqara forum arfesinde yapılmaqta.

Meclis reisiniñ birinci muavini Refat Çubarov şunı da qayd etti ki, fesatçılar başqa bir pis adımnı azırlamaqtalar yani qırımtatar halqı genotsidiniñ qurbanları hatırasına Aqmescitniñ merkezinde er sene mayıs 18 künü keçirilgen matem mitingini bozmağa azırlanalar. Toplanğanlar dağılmazdan evel 2012 senesi aprel 9 künü de açıq mahkeme toplaşuvına kelmek qararını bildirdiler.

Böyleliknen, bugünden şunı aytmaq mümkün ki, er mahkeme toplaşuvına yüzlernen-biñlernen qırımtatarlar halqnıñ birligini bozmağa tırışqan fesatçılarğa kesen-kes “YOQ” demek içün toplanacaqlarını tahmin etmek mümkün.