Zarur meselelerni çezmek içün ameliy adımlar atmaq kerek

01 Mart 2012

Fevral 29 künü Qırım Yuqarı Şurasınıñ Milletlerara munasebetleri ve deportatsiyağa oğrağan grajdanlarnıñ Daimiy komissiyasında Qırımtatar Yazıcıları birliginiñ kenişletilgen toplaşuvı olıp keçti.

Toplaşuvda QMC Yuqarı Şurası Milletlerara munasebetler ve sürgün olunğan grajdanlarnıñ meseleleri boyunca daimiy komissiyasınıñ reisi, Milliy Meclis reisiniñ muavini Remzi İlyasov, Reskomnats reisi Edem Dudakov, Milliy Meclis medeniyet ve tasil idaresiniñ reberi, QMC Yuqarı Şurasınıñ deputatı Safure Kacametova, kütleviy informatsiya vastalarınıñ vekilleri de iştirak ettiler.

Edebiyat – maneviyatnıñ küzgüsidir. Soñki devirde edebiyatnıñ da, maneviyatnıñ da qadiri bilinmey. Edebiyatçılar öz yağına özleri qavurılalar. Biri eser yaza, onı çıqarıp olamay, biri kitap çıqara, onı satıp olamay. Daa biri roman yazğan olsa da, emek aqqımnı almağance onı basmam, dey. Qısqası, bugün yazıcınıñ yaşayışı da qolay degil.

Toplaşuv devamında milliy edebiyatımıznıñ şimdiki vaziyeti, edebiyatımıznı kütleviyleştirüv, yaş istidatlarnen çalışuv, yazıcılarğa qalem aqqı tölev ve olarnıñ müelliflik aqlarını qorçalav kibi meseleler baqıldı. Yazıcılar birliginiñ reisi Riza Fazıl bu meseleler pek aktual olğanına baqmadan, vaziyet yıl-yıldan ağırlaşayatqanı, yazıcılarğa devletten yardım ve diqqat ayırılmağanı, kitap ve derslikler çıqaruvda qarışıqlıqqa yol berileyatqanını qayd etti.

“Yıldız” mecmuasınıñ baş muarriri Dilâver Osmanov mecmuanıñ vaziyeti ve planları hususında ayttı. Yazıcılar birliginiñ idare azalarından Ablâziz Veliyev, Üriye Edemova, Şeryan Ali, Zakir Qurtnezir öz çıqışlarında bediiy edebiyanı neşir etüv, qırımtatar tilinde edebiy-bediiy neşriyatnı yañıdan tiklev, müelliflik aqlarına riayet etüv, yazıcılarnı rağbet lendirüv, “İlham” edebiy birleşmesine qoltutuv, yaş qalemlerniñ almanahını çıqaruv meselelerini köterdiler.

Safure Kacametova yazıcılarnıñ çıqışlarını diqqatnen diñlegen soñ, cemiyette yazıcılar ve ocalarnıñ rolü ğayet emiyetli olğanını aytaraq, toplaşuvda köterilgen meseleler kerçekten de beraberlikte çezilmek kerekligini qayd etti. Aynı vaqıtta o, yazıcılarğa daa da faal olmaqnı, Qırım ve Ukraina akimiyet organlarına, halqara teşkilâtlarğa konkret leyha ve tekliflernen muracaat etmekni tevsiye etti.

Zarur meselelerni çezmek içün ameliy adımlar atmalı. Yazıcılarımız “Maarifçi” birleşmesiniñ “Atalıq” programması boyunca Qırımnıñ bir çoq mekteplerinde bulundılar, programmanıñ ameliy yardımı büyük oldı. Endi bu programmanı yazıcılarnıñ özleri de devam etseler yahşı olur. Qırımtatar tilinde bediiy neşriyatnı mıtlaqa ğayrıdan tiklep, onıñ işini “Qırımoquvpedneşir”de devam ettirmeli. Yazıcılar birligi “İlham” edebiy birleşmesini de öz imayesi altına almalılar, – dedi o.

Edem Dudakov ve Remzi İlyasov tekliflerge qoltutıp, yazıcılarğa imkânı olğanı qadar yardım etmekni işandırdılar ve, kene de, yazıcılarnı er bir saada ziyadece faallik köstermege çağırdılar.