Otuzda köydeşler körüşüvi

22 Oktâbr 2011

2011 senesi oktâbr 22 künü Otuz köyüniñ sakinleri er sene keçirilgen köydeşler körüşüvini  ötkerdiler. Şimdi adı  Şçebetovka diye deñiştirilgen Otuz köyü Qırımnıñ cenübiy-şarqiy yalısında  Kefe rayonındaki Qaradağ eteginde yerleşkendir.

Böyle körüşüvler daima milliy, sıcaq ve unutılmaz bir müitte keçe. Ava da sanki bu körüşüvge sevingeni kibi küneş nurlarınen quvandırdı. Qırım ve  Ukrainanıñ çeşit şeerlerinde yaşağan 300-den ziyade insan sevimli Otuz köylerine toplandılar. Kefe regional ve yerli meclisler köylülernen beraber bayramnı olduqça tantanalı ve quvançlı yapmağa tırıştılar.

Medeniyet evinde ocaqta pişirilgen pilâv ve köy sakinleriniñ öz bağçalarından ketirgen meyvaları ile sofralar donatılıp, er keske qoqulı qave de berildi.

Köyniñ “Otuz yıldızları” degen eñ yahşı oyun  ansambli  milliy oyunlarnıñ icrasınen er kesni hoşnut etti. Musafirler arasında  bulunğan Qırımtatar halqı Meclisiniñ reisi Mustafa Cemilev otuzlılarnı hayırladı ve köydeşler körüşüvindeki kibi birlik-beraberlikni daa da qaviyleştirmekni tiledi.

Körüşüvde “Candan sevgen Otuz köyüm” kitabınıñ taqdimi  ve ATR kanalı çıqarğan  “Nesillerni toplağan Otuz” filmi  Otuz köy sakinleri içün aqiqiy bahşış oldı. Bir yıl devamında “Tezis” neşriyatınıñ direktorı Otuz köyüniñ faalleri Vade Kazakova ve Nuri Emirveliyevnen birlikte kitap içün tarihiy malümatlar ve eski resimlerni  topladılar. “Tezis” neşriyatınıñ şiarı – qırımtatar köyleriniñ tarihını canlandırmaqtır, – dedi öz çıqışında  Ediye Müslimova. Bu rubrika altında neşriyatımız endi altıncı kitapnı basmaqta. Bu sefer Otuz köyü aqqında kitapnı çıqardıq”, – dedi  E. Müslimova ve malümatları, hatırlavlarınen paylaşqan, kitapnıñ azırlanmasına issesini qoşqan Otuz köyüniniñ sakinlerine teşekkür bildirdi.

Bundan da ğayrı, kitap çıqacağını eşitken Otuz köyüniñ sakinlerinde köyde tarihiy-etnografik müzey teşkil etmek ğayesi doğdı. Müzey teşebbüsçileri Löman Üseinov ve Gülnara Appazova müzeyni cami içinde yerleştirdiler. Bir çoq ay devamında  bina tamir etildi, eksponatlar toplandı. Bularnıñ ekseriyetini otuzlılar aileviy arhivlerinden ketirdiler. “Tezis” neşriyatı da kitapta qullanılğan 300-den ziyade eski resimlerni tüzetip  müzeyge taqdim etti.  

“Bu – halqımız tarihını saqlap qaluv, artıq tiklemekniñ imkânı olmağan köylerniñ tarihını canlandıruv  işine qoşulğan büyük issedir, – dedi Meclis reisi müzey açılışı vaqtında çıqışında.- Amma ögde daa çoq iş bar, endi müzey köntseptsiyasını işlevge de emiyet bermek kerek”.

Meclis reisi  müzey eksponatlarını yönelişler boyunca tertipke ketirmekni tevsiye etti.