Обращение о родном языке

Qırımtatar Milliy Qurultayınıñ ana tili inkişafı
boyunca MURACAATI 

Muhterem vatandaşlar! 

III Qırımtatar Milliy Qurultayınıñ 2-nci sessiyasınıñ (1999 s., 1-3 oktâbr) “Ana tili meselesi” aqqında qararına ve yazıcılarımıznıñ halqımızğa olğan muracaatına esaslanıp, Mılliy Meclis öz toplaşuvında (2003 s., 11 yanvar) “Ana tili oğrunda kureş programması” boyunca qararlar qabul etken edi. Bu vesiqalarda halqımıznıñ öz Vatanında millet olaraq ğayrıdan tiklenmesi ceryânında eñ muim meselelerden biri ana tili olğanı qayd etile. 

Milliy Meclisimizniñ reberligi altında epimiz bir olıp, “Ana tili oğrunda kureşke atlanayıq!” şiarını ilân etken edik. Bu aqta mahsus programma qabul etildi ve o milletimizge ait bütün teşkilâtlarda, yerlerde milletimiz içün destür olmalı. 

IV Qurultaynıñ 3-nci sessiyası bu meseleniñ muim olğanını tekrar qayd ete ve bütün halqımızğa muracaatta buluna: millet olaraq devletçiligimizni elde etüv oğrunda kureşimiz devam eterken, butün idrak ve ğayretimizni, elimizde olğan butün imkânlarnı ana tilimizniñ pekinmesi ve inkişaf etmesine doğrultmalımız. 

Tilimizniñ meselesi – umummillet meselesi, milletimizniñ taqdirinen bağlı meselesi olğanını daima diqqat merkezinde tutmalımız. 

Milliy informatsiya vasıtalarımızda, oquv-maarif muessiselerimizde, icadiy teşkilâtlarımızda, yerli meclislerimizde, er bir Qırımtatar ailesinde ana tiline ürmet – itibar, ana-babağa ürmet-itibar kibi saqlanmalıdır. 

Ana tilimiz – qadimiy tamırı olğan milliy varlıq-variyetimizdir. 

Ana tili – milliy devletçiligimizniñ eñ qaviy temeli olacağını millet unutmamalı. 

Qırımtatar Milliy IV Qurultayı 
3-nci sessiyasında qabul etildi. 
2004 s., 12 sentâbr, Aqmescit ş.