Выступление Али Озенбаша

V Миллий Къурултай делегаты Али Озенбашнынъ чыкъышы
(Выступление делегата Курултая V созыва Али Озенбаша) 

Биз бу фурсатнен къулланып, бираз первасыз семетдешлеримиз фаалиетини юксек севиеге котерильмесини талап этмеге ве биз, шаир айткъаны киби, бир авуч халкъ дегиль – бир юмрукъ халкъ олгъанымызны косьтермек керекмиз! 

Энди, умют этем, бизим реисимиз Мустафа агъа реберликни озь къолунда тутар ве биз бундан, эльбетте, къазанырмыз. 

Миллий Меджлисимизге тазе гъаелер, денъиш-мелер, янъы имкянлар кельсин ве о къуветлешсин. Акъмагъан сув тез бозула. Бизим гольчикни бираз темизлеп, озенге чевирмек вакъыт кельгендир. 

Бу себептен Къурултай бойле меселелер боюнджа къарарлар алмакъны теклиф этем: 

1. Рей бермек тертибини денъиштирмеге. Меселелерни эсас оларакъ бакъмагъа. Хусусий меселелерни «бакъмагъа, я да бакъмамагъа» киби суальни рейге къоймакъ амелинден вазгечмек. 

2. Къырым Юкъары Шурасына озъ намзет-леримизни косьтермек. 

3. Миллий Меджлис азаларынынъ ротациясыны кечирмеге ве Меджлис азаларыны янъыдан сайламакъ. 

4. Къырым Миллий Къурултайнынъ идеоложи идаресини яратмагъа ве оны реисини сайламакъ. 

5. Халкъымызнынъ рухий бирлигини пекитмек ичюн комитет я да идаре тизмек. 

6. Миллий адетлеримизни сакъламакъ, оларнынъ отькермесине къолтутмакъ (тойлар, дженазелер ве дигер тедбирлер) эм де оларнынъ медений севиесини котермек боюнджа комитет я да идаре яратмакъ ве онынъ реисини сайламакъ. 

7. Миллий Меджлиске эм де региональ, ерли меджлислерге миллий сой адларымыз догъру язылмасынынъ сиясий эмиетини ве III Курултайны къарары анълатмасыны авале этмек. 

8. «Къырымтатар халкъынынъ ерли озь-озюни идаре этюв органлары акъкъында низамнаме»ге ерли меджлис ве дигер миллий озь озюни идаре этюв органларынынъ азалары ана тилини бильмелери шарт, деген маддени кирсетмек. 

9. «Къырымтатар халкъынынъ ерли озь озюни идаре этюв органлары акъкъында низамнаме»ге шу органларгъа къырым тилинде лаф этмеген дигер миллет векиллерини кирсетмеге имкян яраткъан маддени чыкъарып ташламакъ. 

10. Миллий бюджет къурмакъ меселеси боюнджа лейиха азырланувны алып бармакъ.