6-ncı çağırılış Qurultaynıñ birinci oturımında Qurultay ve Meclisniñ yañı erkânını şekillendirüv problemi boyunca mustaqil ekspert tedqiqatı keçirilecek

06 Sentâbr 2013

2013 senesi sentâbr-oktâbr aylarında yani Qırımtatar halqı 6-ncı çağırılış Qurultayınıñ 1-nci sessiyası açılması arfesinde “Qırım inkişafı fondı” hayriye teşkilâtı “SPHERA” Araştırma merkezinen birlikte qırımtatar milliy idare organları – Qurultay ve Meclisniñ yañı erkânını şekillendirüv problemi boyunca mustaqil ekspert tedqiqatını keçirecek

Fondnıñ matbuat merkezinde haber etkenlerine köre, araştırma çerçivesinde ekspertlerniñ diqqatına teklif etilgen suallerniñ cevapları Qurultay delegatlarını saylavdan soñ ve Qurultaynıñ birinci sessiyası arfesinde meydanğa kelgen vaziyetni olduqça teren añlamaq imkânını berir.

“SPHERA” informatsion merkez sotsiologları ve analitiklerniñ fikrince bu kibi ekspert araştırma dünya tecribesinde pek keniş tarqalıp, kütleviy institutlarnıñ açıqlığını köstere, – dep qayd ettiler Fondnıñ matbuat hızmetinde. – Araştırmanıñ neticeleri ileride qırımtatar milliy idare organlarınen çalışuvnıñ temelini teşkil etecek. Bu işniñ maqsadı ise sürgün etilgenlerniñ aqlarını ğayrıdan tiklev, ukrain cemiyetine qatıluv olıp, müim meseleler çezimine halqara yardım celp etilecek”

“Qırım inkişafı fondı”nıñ baş direktorı Aleksey Skorik öz nevbetinde mustaqil ekspert araştırmanı böyle izaatladı: “Fondımız teşkil etilgeniniñ birinci kününden açıq ve qavğa-davasız bir cemiyetni quruvda yardımnı öz faaliyetiniñ baş maqsadı olaraq qoydı. Bunıñ içün ise esas şaraitlerden biri cemiyette olıp keçeyatqan adiselerni añlamaq, biri-birini bilmeyüv ve muhalif kibi davranuv neticesinde peyda olğan nefret duyğularını söndürmek, bunıñ kibi de devlet siyasiy sisteminde grajdan cemiyet rolüni arttırmaqtır. Eminmiz ki, Qurultay ve Meclis erkânını teşkillendirüv kibi aktual meseleni ögrengen mustaqil professional sotsiologlarnıñ işi sürgünlikten qaytqan qırımtatar halqı mustaqil şekilde öz milliy idaresini nasıl qurayatqanını bütün Qırım cemiyetine aşkâr eter ve şu ceryan ile bağlı artqaç şübe ve havfsıravğa yer qaldırmaz. Fondımıznıñ bu işte kemter hızmeti mezkür mustaqil araştırmanı teşkil etmek ve keçirilmesini teminlemekten ibarettir”