26 iyün künü Qırımda Milliy bayraq bayramı künü şerefine avtoyürüş ötkerildi

26 June 2013

Avtoyürüş saba erte Şmidt soqağı, 2 adresinde yerleşken Milliy Meclis binası qarşısından başladı. Tedbirden evel “Qırım” hayriye vaqufınıñ reisi Riza Şevqiyev, Meclis kâtibiyetiniñ başı Zair Smedlâyev, Meclis Prezidiumınıñ azasmı Emine Avamileva çıqışta bulundılar, Kebir Cami imamı Niyazi Ramazanov ise dua oqudı.

Arabalar sıranen Qırımnıñ Aqmescit – Bağçasaray – Aqyar – Foros – Simeiz- Yalta – Aluşta – Dobroye şeer ve qasabalarından keçtiler. Bu yerlerde arabalar sırasına yañı arababalar da qoşuldı. Aqmescitte ise kolonna Moskovskaya, Kuybışevskaya ve Amet-Han Sultan meydanlarını aylandılar.

Bayraq bayramı çerçivesinde Aqmescitte “Bizim taraf” bala resimleri yarışı, milliy yemek, milliy küreş yarışları keçirilip, “Bayrağım” adlı fotoresimler sergisi açıldı. Bayram Ukraina ve Qırımda nam qazanğan sanatçılarnıñ icrasında kontsert programmasınen yekünlendi.

Qırımtatar gençler teşkilâtlarınıñ teşebbüsi ile er yılı keçirilgen Bayraq bayramına Milliy Meclis ve Bütündünya qırımtatarlar kongressi qoltutmaqta.