Mayısnıñ 21-nde Çerkes halqınıñ genotsid fedalarınıñ hatırası añıla

21.05.2025

Mayısnıñ 21-nde Ukrayinada ve dünyada 1763-1864 seneleri Kavkaz cenki vaqtında Rusiye imperiyası tarafından kerçekleştirilgen çerkes (adıg) halqınıñ kütleviy yoq etilüvi ve tarihiy vatanından zorbalıqnen sürgünliginiñ fedalarınıñ hatırası añıla.

2025 senesi qara qış ayınıñ 9-nda Ukrayina Yuqarı Şurası maqbul qararınen, Rusiye imperiyasınıñ repressiv rejiminiñ halqlarnı boysundırmaq ve olarğa nisbeten müstemleke siyasetini alıp barmaq maqsadınen yapqan cinaiy areketlerini takbih etip, bu vaqialarnı genotsid olaraq tanıdı.

1763-1864 seneleri Kavkaz cenki vaqtında çerkesler topraqlarınıñ qavmiy temizlenüvi neticesinde çerkezlerniñ 90 faizinden çoqusı yoq etildi ya da vatanından sürgün etildi. Bu, çerkes (adıg) halqını zulum etmek, onıñ kimligini bastırmaq maqsadınen bu qavmiy gruppa içün ayat şaraitini yaratmaq içün yapılğan bir sıra evelden planlaştırılğan sert areketler edi, yüz biñlernen çerkezlerniñ ölümine ketirdi.

Qararda qayd etildi ki, şimdiki Rusiye rejimi, Ukrayina halqınen beraber umumiy “halq apishanesi”nde bulunğanı içün büyük zarar ve azap çekken esir etilgen halqlarnı fizikiy yoq etüv siyasetini devam ete.

Qırımtatar Milliy Meclisiniñ reisi Refat Çubarov Rusiye imperiyası tarafından yapılğan genotsid sebebinden çerkes halqına taziyelerini bildirdi:“Rusiye İmperiyası tarafından esir etilgen halqlarnıñ ğayrıdan doğuvı ve olarnıñ öz topraqlarında kelecegi tek Rusiye Federatsiyasınıñ dağılmasınen mümkün. Çerkes halqınıñ genotsid fedalarınıñ hatırasını añayıq! Rusiye imperiyası tarafından yapılğan genotsid sebebinden çerkes halqına samimiy taziyelerimizni bildiremiz. Çerkeslerniñ kütleviy yoq etilüvi ve zorbalıqnen sürgün etilüvi çerkes halqınıñ genotsidi olaraq tanılsın dep çetel devletlerni ve halqara teşkilâtlarnı çağıralar. Çerkes halqına azatlıq!”, – dep o, Facebook saifesinde yazdı.