2022 senesi rus müstemlekelerine Qırımdan 15 siyasiy mabüs yollandı – uquq qorçalayıcılar

14 Mart 2023

2022 senesi Qırımdan eñ az 15 siyasiy mabüs rus müstemlekelerine yollandı. “QırımSOS” uquq qorçalayıcı teşkilâtınıñ analitikacısı Yevhen Yaroşenko bunı Qırım.Aqiqatqa bildirdi.

– Halqara uquqnıñ çoq qaidesine qarşı rusiye, siyasiy maqsatlı taqipler qurbanlarını öz toprağına ketire. Biz sayladıq ki, tek 2022 senesi vaqtınca işğal etilgen Qırımdan eñ az 15 siyasiy mabüs, rusiyeniñ topraqlarındaki müstemlekelerge yollandı, – dep Yaroşenko añlattı.

“QırımSOS” qayd etti ki, Qırımdan siyasiy mabüslerniñ yollanğanları rus müstemlekeleriniñ yerleşkenleri yerler çoq – Tambovsk vilâyetinden rfnıñ Krasnodarsk krayına qadar. Uquq qorçalayıcılar qayd ettiler ki, yarımadadan o qadar büyük uzaqlıqta yerleşken müstemlekelerde siyasiy mabüslerniñ bulunmaları, advokatlarğa öz vaqtında irişimge mania ola.

– Fikrimce, Ukraina vatandaşlarını evine qaytarmaq içün çeşit türlü aletler qullanmaq kerek: em arbiy, em de siyasiy-diplomatik. İnanalar ki, ne qadar çoq arbiy ğalebe olsa, Ukrainanıñ aytışmalar alı o qadar quvetli olır. Buña köre, bütün esir etilgen ukrainalılarnıñ – tek askerler degil, em de grajdanlarnıñ – azat etilmesine o qadar qolayca irişmek mümkün olır, – dep Yaroşenko qoştı.

Ukrain ombudsmanı Dmıtro Lubinetsniñ oñ bilgilerine köre, rusiye Qırımdan 180 siyasiy mabüsni qanunsız olaraq tuta, olardan 116sı qırımtatar.

Bu sene kiçik ayda rus esirliginde Qırımdan eki siyasiy mabüs elâk oldı – Konstântın Şırinh ve Cemil Ğafarov.