2014 senesi mart 15 künü Qarasuvbazar rayonınıñ Ortalan köyünde erkekniñ cesedi tapıldı

16 Mart 2014

Mart 16 künü işniñ asılını ögrenmek içün Qarasuvbazar şeer prokuraturasına barğan Qırımtatar halqı Meclisi adliye bölügi yolbaşçısı Teyfuq Ğafarovnıñ bergen malümatlarına köre mart 15 künü Qarasuvbazar rayonı Ortalan köyü civarındaki tarlada qıynap öldürilgen erkek adamnıñ cesedi tapılğan. Cesetni tapqan insanlar militsiya çağırğanlar.

“Al-azırda merhumnıñ cesedi Qarasuvbazar morgında bulunmaqta, – dedi T. Ğafarov alınğan malümatqa esaslanaraq. – İnsannıñ kim olğanını belgilemek boyunca iş alıp barılmaqta”.

Tasdiqlanmağan malümatlarğa köre elâk olğan insan Qırımda keçenlerde ğayıp olğan qırımtatarı ve belgileri ğayıp olğan insanlar bazasında bulunğan insanlardan biridir. Amma, bu malümatnı kesen-kes tasdiqlap olamaymız”.

Bundan da ğayrı, T. Ğafarovnıñ söylegeninet köre Meclis vekilleri Qırım musulmanlarınıñ müftisi acı Emirali Ablayevnen beraber elâk olğanı tahmin etilgen insannıñ ailesini yoqladılar.

Mart 17 künü taqiqat işleri keçirilgen soñ elâk olğan insannıñ kimligi kesken-kes belgilenecek.