2013 senesi oktâbr 7 künü Meclisniñ toplaşuvı olıp keçti

07 Oktâbr 2013

Toplaşuvnıñ kün tertibine VI çağırılış Qurultayı kün tertibine kirsetilecek meseleler qoblıp, Meclis azaları Qurultay 1-nci oturımı kün tertibiniñ ve oturımnı alıp barmaqnıñ tahminiy tertibi leyhalarını muzakere ettiler.

Meclis Kâtibiyeti azırlağan dokument leyhalarnıñ muzakeresinden soñra Meclis azaları Qırımtatar halqı VI çağırılış Qurultayı kün tertibiniñ leyhasını tasdiqlap, Teşkiliy komitetke özüniñ nevbetteki toplaşuvında 1-nci oturımnı alıp barmaqnıñ tahminiy tertibi leyhasını işlemekni ve reglament boyunca Qurultay delegatlarına yollamaqnı avale ettiler.

Meclis toplaşuvı çerçivesinde Meclis reisiniñ birinci muavini Refat Çubarov Meclis azalarını Meclisniñ Qırımtatar halqınıñ aqlarını ğayrıdan tiklev boyunca halqara forumğa aktiv azırlıq işlerine dair Muracaatınıñ leyhasınen tanış etti.

Muracaat birağızdan qabul etildi. “Qırımtatar halqınıñ Meclisi 2014 senesi Ukraina devletiniñ inkişafında ğayet bir emiyetli yıl olacağına, büyük Avropanıñ inkişafına isse qoşıp başlaycaq Ukrainanıñ areketleri cümleden qırımtatar halqı aqlarını ğayrıdan tiklep başlaması ve halqqa öz Vatanında inkişaf etmesine kefillik bermesinen belgilenecegine ümüt ete”, – denile Meclisniñ muracaatında.

Bundan da ğayrı, toplaşuvda çıqışta bulunğan Meclis Kâtibiyetiniñ başı Zair Smedlâyev şunı haber etti ki, oktâbr 7-ge keçer gecesi Gasprada 30 qırımtatar qorantası yaşağan eV yandı. Qaza yüz bergen yerde Meclis azası, Yalta şeer şurası milletlerara munasebetler ve migratsiya bölüginiñ başı Zaur Smirnov bulunıp, Vefqulade vaziyet hızmeti hadimlerinen beraber facianıñ sebebi ve aqibetlerini ögrenmekte.

“Üç qatlı eV gecesi yandı. Ateş insanlarnı meskensiz qaldırdı, evniñ damını yoq etti, – dedi Smedlâyev. – Bahtqa qarşı, iç bir insan elâk olmadı, amma evniñ sakinleri soqaqta iç bir şeysiz qaldılar”. Meclis Kâtibiyetiniñ başı Meclis azalarından çare-imkânlarına köre yanğından zararlanğan semetdeşlerimizge yardım bermelerini rica etti.

Öz nevbetinde Meclis azaları yanğından zarar körgen insanlarğa yardım bermege azırlıqlarını tasdiqladılar.