2013 senesi dekabr 2 künü Meclis Prezidiumınıñ toplaşuvı olıp keçti

02 Dekabr 2013

Ukraina halq deputatı Mustafa Cemilev, Qurultay Teftiş komissiyasınıñ reisi Ali Özenbaş ve Aqmescit regional meclis reisi Lemmar Yunusov iştirak etken toplaşuvnıñ devamında Meclis reisiniñ muavini Ahtem Çiygoz bulunğanlarnı dekabr 10-da Halqara insan aqları kününe bağışlanğan Bütünqırım mitingine azırlıq aqqında malümat berdi.

A. Çiygoznıñ aytqanına köre epsi regional ve yerli meclisler planlaştırılğan mitingde iştirak eteceklerini tasdiqladılar.

“Dekabr 10-na qadar milliy matbuat vastalarında Halqara insan aqları kününe bağışlanğan videorolik numayış etilecek, – bildirdi Meclisniñ informatsion-analitik idaresiniñ başı Nariman Celâl. – Bunıñ kibi de dekabr 5 künü Meclis reisi muavinleriniñ iştirakinde matbuat konferentsiyasını keçirmek planlaştırıla”

Meclis Prezidiumınıñ azaları Meclisniñ dekabr 5-te keçirilecek toplaşuv kün tertibiniñ leyhasını muzakere ettiler.

“Toplaşuv kün tertibiniñ leyhasına Lenin rayonında regional meclisniñ yañı reisi saylanacaq regional konferentsiyanı keçirüv kününi tasdiqlamaq meselesi de kirsetildi, – dep seslendirli Meclis reisi R. Çubarov. – Bunıñ kibi de o, diqqatnı şuña celp etti ki dekabr ayı devamında Qırımnıñ 10 regionında Meclis reisi, Meclis idare ve hızmetleriniñ yolbaşçıları, Qırım musulmanları diniy idaresi, regional ve yerli meclisler, yerli şuralarnıñ deputatları ve 6-ncı çağırılış Qurultay delegatlarınıñ iştirakinde kenişletilgen işç toplaşuvlarnıñ keçirilmesi planlaştırıldı.

Prezidium toplaşuvında bunıñ kibi de Ukrainadaki siyasiy vaziyet ve noyabr 30-dan dekabr 1-ge keçer gecesi “Yevromaydan” tınç iştirakçileriniñ qanlı dağıtılması munasebetinen Meclisniñ mahsus beyanatını qabul etüv qararı alındı.

Kiyevde dekabr 1 künü “Halq toplantısında” çıqışta bulunğan Meclis reisi Refat Çubarov tahminen 1 milliondan ziyade numayışçılarnı toplağan “Yevromaydan” pozitiv energiyası ve vatanperverlik ruhınıñ yüksek seviyesini qayd etti.