2013 senesi avgust 4 künü Milliy Meclis reisi Mustafa Cemilev Ümreden qayttı

05 Avgust 2013

“Simferopol” ava limanında Meclis reisi Mustafa Cemilevni Qırım musulmanlarınıñ müftisi haci Emirali Ablayev qarşıladı ve er bir musulman içün farz oldığı muqaddes yerlerge yapqan ziyareti ile samimiy hayırladı.

Bunıñ kibi de Meclis reisi Mustafı Cemilevni onıñ muavini Ahtem Çiygoz, Qırım musulmanları müftisiniñ muavini Ayder İsmailov, “Qırım” hayriye fondunıñ direktorı Riza Şevkiyev, haci Enver Ümerov ve Meclis tışqı alâqalar bölügi başınıñ muavini Abduraman Egiz qarşıladılar.

2013 senesi iyül 31-den avgust 4-ke qadar yani Ramazan ayınıñ soñki on künü içersinde Milliy Meclis reisi Mustafa Cemilev ve Kiyevdeki qırımtatarlar cemiyetiniñ başı Aslan Ömer Qırımlı Mekkege barıp Ümre ibadetini qıldılar.

Meclis reisi Mustafa Cemilevni ve Kiyevdeki qırımtatarlar cemiyetiniñ başı Aslan Ömer Qırımlını ziyaretke Saudiya Arabistanı Qırallığınıñ Ukrainadaki Elçisiniñ vekili Cüdiyu Ben Zabin Alhzal davet etti

İyül 31 künü Meclis reisi M. Cemilev Ümreni qılğan soñ Kâbe şerif bulunğan Mekke baş camisiniñ imamı, Saudiya Arabistanı “Davet” islâm birleşmesi idaresiniñ prezidenti doktor Suleyman Al-Sallomi ve onıñ yanında bulunğan aliy dindar şahsılarnen körüşti. Bir buçuq saat devam etken subet vaqtında taraflar Qırım musulmanlarınıñ vaziyeti, Qırım ve Saudiya Arabistanı arasındaki bağlarnıñ inkişafı meselelerini muzakere ettiler.

Müftiy As-Sallomi Saudiya Arabistanı dinsiz sovet totalitar rejimine qarşı olıp, onıñ müstemlekesi altında eziyetlengen halqlarnıñ tarafını tutqanını qayd etip,bazıda eki devlet arasındaki munasebetler açıq cenk kenarına yaqınlaşqanını hatırlattı.

Musulman ümmetine dava ve fesat ketirgen çeşit sektalar meselesinde doktor As-Sallomi şunı qayd etti ki, bir çoq böyle allarda bunıñ sebebi insanlar islâm ahlâqınıñ qaidelerini bilmegenlerinde, eger de din boyunca bilgiler kenişçe tarqatılsa, bu problemler eksilir. Elçi vekili Qırım gençlerine Saudiya Arabistanınıñ diniy universitetlerinde aliy tasil almağa yardım etecegini işandırdı. Müftiy As-Sallomi qırımtatar halqınıñ tarihı, Vatan oğrunda küreşinen bağlı, şu cümleden Meclis reisiniñ kendi qaleminen yazdığı kitaplarnı almağa istegenini bildirdi.

Subetniñ soñunda Müftiy As-Salomiy Meclis reisine altınnen süslengen Qurannıñ Damaşq basmasını ve Saudiya Arabistanında meşur misler komplektini ediye etti.