2013 senesi avgust 15 künü Meclisniñ nevbetteki toplaşuvı olıp keçti

15 Avgust 2013

Meclisniñ 2013 senesi avgust 15 künü olıp keçken nevbetteki toplaşuvınıñ kün tertibine eki mesele qoyuldı – Umumavropa natsizm ve stalinizm qurbanlarınıñ hatıra kününe bağışlanğan mitingni ötkerüvge azırlıqnıñ ketişatı aqqında informatsiya. Kün tertibiniñ ekinci ve baş meselesi VI çağırılış Qurultaynıñ 1-nci sessiyasını keçirüv boyunca qarar almaq oldı.

Birinci mesele boyunca çıqışta bulunğan Meclis reisiniñ birinci muavini Refat Çubarov Meclis azalarına mitingge azırlıq boyunca teşkiliy komitet yapqan iş aqqında esabat berip, miting er yıldakisi kibi Salğır bağçasında sürgünlik qurbanlarınıñ hatıra taşı yanında olacağını hatırlattı. Mitingde Qırımnıñ bütün regionlarından 1000-den ziyade adam iştirak etmesi beklenile.

Altıncı çağırılış Qurultayınıñ birinci sessiyası keçirilecek künni belgilemek boyunca Meclis reisi Mustafa Cemilev, onıñ birinci muavini Refat Çubarov, Qurultay Merkeziy saylav komissiyasınıñ reisi Zair Smedlâyev ve diger azaları çıqışta bulundılar. Muzakere devamında Qırımtatar halqı VI çağırılış Qurultaynıñ 1-nci sessiyasını 2013 senesi oktâbr 26-27 künleri keçirmek qararı qabul etildi.

VI çağırılış Qurultaynıñ 1-nci sessiyasını azırlav ve keçirüv boyunca teşkiliy hızmetke 2013 senesi oktâbr 1-ge qadar Qurultay sessiyası kün tertibiniñ leyhası ve tahminiy iş planını Meclis tarafından tasdiqlanması içün taqdim etmek ve tasdiqlanğan soñ Qurultay delegatlarına yollamaq vazifesi berildi.