2012 senesi dekabr 21-de Aqmescitte stalincilerniñ çıqışları munasebetinen Qırımtatar halqı V Qurultayınıñ ukrain cemaatçılığına muracaatı

14 January 2013

ХХ asırnıñ eki totalitar rejimi – kommunist ve natsist rejiminiñ cinayetleri insanlıqqa zıt olğanı içün er yerde qaralanmalı! Ukrainada stalin rejimini canlandırmaq areketleri yasaq etilmeli!

2012 senesi dekabr 21-de Aqmescitte Rusiyeniñ “Sut vremeni – Krım” teşkilâtınıñ regional bölügi SSSR halqlarınıñ belli cellâtı İosif Stalinniñ doğğan kününe bağışlanğan sergini teşkil etti. Onda natsist qatilleri Adolf Gitler ve Yohima Ribbentropnıñ fotoları numayış etildi.

Bir çoq halqlarnıñ başına, şu cümleden Ukraina halqı içün de felâket ketirgen HH asırnıñ eñ qanlı şahıslarından biri olğan İ. Stalinniñ cinaiy faaliyeti Ukrainanıñ 2006 senesi noyabr 28-de qabul etken “Ukrainada 1932-1933 seneleri açlığı aqqında” Qanunı ve 2010 senesi yanvar 13-te makheme qararınen üküm etildi. Bu qararlarğa köre Stalin ukrainlerniñ soyqırımında baş qabaatlı, dep tanıldı. Stalinniñ cinayetlerini OSCE Parlament

Assambleyası 2009 senesi iyül 3-te qabul etken “Bölüngen Avropanıñ birleşmesi” qararı da qaraladı.

Soñki vaqıtta Ukrainada, bilhassa Rusiyede, bir sıra fesatçı teşkilâtlarnıñ pek faal olğanı közetile. Olar kommunist vahşiyini “rus medeniyeti tarihında” eñ körümli devlet erbabı olaraq tanıtmağa tırışalar. Bu ise sovet devletiniñ açlıq, repressiya, sürgünlik, soyqırım kibi afatlarnı başından keçirgen bir çoq halqlarını, bahusus, rus halqınıñ kendisi de bergen qurbanlarınıñ hatırasını aqaret ete.

Böyle provokatsion serginiñ teşkilâtlandırılması bu sene Avropada eñ nufuzlı teşkilâtqa reislik yapacaq Ukrainanıñ itibarını tüşüre. Belli ki, OSCE bir çoq qatillikler içün cevapkâr olğan stalin ve natsist rejimlerini qaralağan bir sıra qararlarnı qabul etti.

Yerli akimiyet tarafından yasaqlanmağan, toqtatılmağan mezkür sergi OSCE azası olğan Ukraina tarafından nizamnı bozuv oldı. Kendisini Avropa devleti dep sayğan Ukrainağa böyle areket iç yaraşmay.

Serginiñ keçirilmesine keder etken ve sergige munasebetini bildirgen semetdeşlerimizniñ nefretini paylaşamız, çünki ille şu cellâtnıñ sebebinden qırımtatar halqı Vatanından mahrum oldı, sürgünlikte yarısını ğayıp etti.

Biz ukrainlerni ve umumen er angi millet vekillerini qırımtatarlarğa qoltutmağa ve cinayetçini halqlarnıñ hatırasını aqaret etmek, fesat çıqarmaq maqsadında qullanılmasına qarşı çıqmağa çağıramız.

Biz stalinizm, natsist ve kommunist rejimleriniñ pis asabalığından ebediyen vazgeçmek kerekmiz. Eminmiz ki, stalinizmni canlandırmaq niyetinde keçirilgen böyle “tedbirler”niñ teşkilâtçıları mahkeme etilmeli. Ukraina Yuqarı Şurası ve Devlet Prezidenti de olarnı cevapqa çekmesi zarur.

 

Qırımtatar halqı V çağırılış Qurultayınıñ delegatları
2013 senesi yanvar 12.
Aqmescit ş.