Rusiye işğaline muqavemet kününe kiçik aynıñ 19-nad Kıyivde qırımtatar ve ukrain muzıkasınıñ hayriye kontserti olıp keçti 

20 February 2025

Şeyh Mansur adına batalyonnıñ “Siri vovkı” (“Boz qaşqırlar”) bölügine ve Mudafaa nazirliginiñ Baş istihbarat idaresniñ askerlerine desket bildirmek içün Qırım cebesi, Qırım Media, Cemaat Media ve Crimea Daily tarafından teşkil etilgen ve Aktör evinde olıp keçken kontsert vaqtında kemanci Şevket Ablâlimov ve Taras Yaropud, pianinocı Andriy Vasin, violonçelci Natalâ Yaropud, altçı Andriy Tuçapets, akkordeoncı Şevket Zmorka ve Ukraina halq sanatçısı Femiy Mustafayev iştirak ettiler.

Tedbir vaqtında hayriye mezatı olıp keçti, anda qırımtatar halqınıñ lideri Mustafa Cemilev, Qırımtatar Milliy Meclisiniñ reisi Refat Çubarov, Qırımtatar Milliy Meclisiniñ reisiniñ birinci muavini Nariman Celâl, Qırımtatar Milliy Meclisiniñ reisiniñ muavinleri İlmi Umerov ve Ahtem Çiygöznıñ imzalarınen qırımtatar bayrağı satıldı. Mezatnıñ ekinci lotı Mudafaa nazirliginiñ Baş istihbarat idaresiniñ reisi Kırılo Budanovnıñ imzasınen Ukraina bayrağı oldı. Soñ ürmetli usta, qırımtatar ressamı Rustem Skıbinniñ örneginen fron satıldı.

Kemaneci Şevket Ablâlimov, sanatnıñ Qırımnı qaytaruv oğrunda küreşte pek yardım etkenini tarif etti:

“İşğalden azat etüv ceryanı ne vaqıt devam etecegini bilmeymiz. Öz tamırlarımız, özdeşligimizni coymamamız eñ müimdir. Sanat ise – bizim mustaqilligimizni saqlap qalmağa yardım etken eñ müim vastalardan biridir”.