Kiçik aynıñ 18-nde Ukraina ve Türkiye Prezidentleri körüşecekler

17 February 2025

Salı künü, kiçik aynıñ 18-nde, Ankaradaki Prezident kompleksinde Türkiye prezidenti Recep Tayyip Erdoğannıñ Türkiyege resmiy ziyaretnen kelgen Ukraina prezidenti Volodımır Zelenskıy ile körüşüvi olacaq.

Resmiy ukrain vekilleri arasında Qırımtatar Milliy Meclisiniñ reisiniñ birinci muavini, Ukrainanıñ Türkiyedeki yañı tayin etilgen elçisi Nariman Celâl olacaq.

Körüşüv aqqında Türkiye prezidenti ofisiniñ kommunikatsiyalar bölüginiñ müdiri Fahrettin Altun bildirdi. O, X içtimaiy ağındaki saifesinde yazdı ki, körüşüvler vaqtında Türkiye ve Ukraina arasında strategik ortaqlıq munasebetleriniñ bütün tarafları baqılacaq ve eki memleket arasında işbirlikni daa da pekitmek içün yapılacaq adımlar muzakere etilecek. Ziyaret vaqtında Ukrainadaki soñki vaqialar ve diger bölge ve global meseleleri boyunca fikirler paylaşılacaq.