142 Türkiye vatandaşı çetel ukrain statusını aldı

10 December 2024

142 qırımtatar aslı Türkiye vatandaşı çetel ukrain statusını aldı.

İlk qış ayınıñ 9-nda Ukraina tış işleri naziriniñ muavini Maryana Betsanıñ yolbaşçılığında ecnebiy ukrainler meseleleri milliy eyyetiniñ 58-inci oturışında haber etildi. Oturışta Qırımtatar Milliy Meclisiniñ reisi Refat Çubarov iştirak etti.

“Tışqı işleri naziriniñ muavini, Ukraina çetel vatandaşları meseleleri milliy eyyetiniñ reisi Maryan Betsa ve Eyyetniñ azalarına, Türkiyeniñ 142 qırımtatar aslı vatandaşına çetel vatandaş statusı berilmesi aqqında qarar içün minnetdarım. Rusiye-Ukraina cenki şaraitinde alınğan bu qarar, Rusiye imperiyasınıñ müstemlekecilik siyaseti neticesinde öz tuvğan toprağından sürgün etilgen qırımtatar diasporasınıñ vekilleriniñ, olarnıñ vatanı olğan Qırım  da ayırılmaz bir parçası olğan mustaqil Ukraina devletine olğan samimiy munasebetlerini köstere”, – dep izaatladı Meclis reisi.

“Çetel ukrainleri aqqında” Ukraina qanunına binaen, çetel ukrain statusını alğan şahısnıñ aşağıdaki aqları bar:

– işhaneler, müessiseler ve teşkilâtlarda çalışmaq ya da Ukraina vatandaşları içün belgilengen sebepler ve tertip boyunca başqa iş faaliyetini alıp barmaq;

– Ukrainağa barmaq içün bedava bir qaç kerelik vizanı resmiyleştirmek;

– qanun boyunca belgilengen şekilde, immigratsiya kvotaları tışında daimiy yaşamaq içün immigratsiya ruhsetini almaq;

– Ukraina aliy oquv yurtlarına qabul etüv kvotaları çerçivesinde devlet siparişi çerçivesinde bedava tasil almaq.

Foto: Ukraina Tış işleri nazirligi / MFA of Ukraineniñ Facebook saifesi