İlk küz ayınıñ 10-u – Qırımtatar tili ve edebiyatı künü

10.09.2025

Ukrayina Nazirler Kabinetiniñ 2022 senesi kiçik aynıñ 23-ndeki 224-r buyruğınen tasdıqlanğan 2022-2032 seneleri Qırımtatar tiliniñ inkişaf strategiyasına köre, Ukrayinada Qırımtatar tili ve edebiyatı künü belgilenmeli.

“Strategiya”nıñ qayd etilgen vazifesini yerine ketirmek maqsadınen Qırımtatar Milliy Meclisi qırımtatar cemaatı, qırımtatar tarihı, edebiyatı, medeniyeti, tilşınaslığından alimlernen teşkil-mesleat tedbirlerini evelden keçirdi.

Subetler neticesinde 2024 senesi mayıs ayında Qırımtatar Milliy Meclisi ilk küz ayınıñ 10-unı, qararı qırımtatar tiliniñ kelecek inkişafı içün müim olğan 1927 senesi Aqmescitte Bütünqırım imlâ konferentsiyası açılğan künü, Ukrayinada Qırımtatar tili ve edebiyatı künü olaraq belgilemek içün Ukrayina Medeniyet ve malümat siyaseti nazirligine mektüp yazıp yolladı.

Bir yıl devamında Ukrayina Nazirler Kabineti müddetlerni bozıp, Qırımtatar Milliy Meclisiniñ teklifini baqıp qarar etmegenine ve Ukrayina Prezidentine “Qırımtatar tili ve edebiyatı kününi belgilev aqqında” emriniñ maqbul leyhasını bermegenine baqmadan, Qırımtatar Milliy Meclisi ve qırımtatar cemaat teşkilâtları oquv yurtlarınen ve Ukrayina devlet organlarınen beraber 2025 senesi ilk küz ayınıñ 10-nda ilk kere Qırımtatar tili ve edebiyatı kününe bağışlanğan tedbirlerni keçireler.

Qırımtatar Milliy Meclisinden ve şahsen özümden vatandaşlarımıznı Qırımtatar tili ve edebiyatı kününen hayırlayım!

Refat Çubarov,

Qırımtatar Milliy Meclisiniñ Reisi

2025 senesi ilk küz ayınıñ 10-u

Kıyiv ş.

Hatırlatamız ki, bugün Kıyivde Qırımtatar Milliy Meclisi ve ortaqları tarafından teşkil etilgen bir qaç tedbir olıp keçecek – panel munaqaşaları, tögerek masa, mektep talebeleri içün tedbirler ve ilâhre. Tafilâtlar – haberde.