10 sene epishanede: işğalciler, qırımtatar Appaz Kurtametni göñülli batalyonğa “para bermek”te qabaatlaylar

29 Mart 2023

rusiyeniñ kontrol etkeni Aqmescitniñ Kıyiv rayon makemesinde rus prokurorı, 20 yaşındaki qırımtatar Appaz Kurtametke 10 senege maküm etmege talap ete. Oğlannı “Qırım” ukrain göñülli batalyonını maliyeviy destek etmekte içün qabaatlaylar. “Qırım ceryanı” uquq qorçalayıcı leyhası bu aqqında haber berdi.

– Munaqaşalar vaqtında qorçalayıcı makemeciniñ diqqatını şuna celp etti: “Qırım” göñülli batalyonnıñ qanunsız silâlı şekillendirüvlerge ait olğanını tasdıq ete bilgen deliller davanıñ malümatlarında yoq. Bundan ğayrı qayd etildi ki, makemede Appaz Kurtametniñ şekillendirüvge para berüv cinayetiniñ sebebi de isbatlanmadı, çünki o, parasını arqadaşına borcğa bere edi, – dep añlatıldı.

Çiçek ayınıñ 19-ında maznunnıñ soñ söznen çıqışı olacaq soñ makeme üküm çıqaracaq.

Keçenlerde 2022 senesi ekim ayınıñ 24-ünde rusiyeniñ kontrol etkeni Qırım Yuqarı makemesi, Herson vilâyetinde 20 yaşındaki qırımtatar Appaz Kurtametniñ tevqifini devam ettirdi.

Refat Çubarovnıñ bilgilerine köre, 2022 senesi oraq ayınıñ 23-ünde Herson vilâyetiniñ Geniçesk rayonındaki Novooleksiyivka qasabasından işğal etilgen Qırımdaki aqrabalarına ketti. Belli oldı ki, o, Qırım ve Herson vilâyeti arasında memuriy sıñırdaki rus keçit noqtasına muvafaqiyetnen keldi. Anda da Kurtametniñ aqrabalarınen bağlantısı bozuldı. Bundan soñ rus quvetçileri onı tuttılar.