{"id":32195,"date":"2012-07-02T21:47:00","date_gmt":"2012-07-02T18:47:00","guid":{"rendered":"http:\/\/qtmm.org\/?p=32195"},"modified":"2022-01-21T21:49:32","modified_gmt":"2022-01-21T18:49:32","slug":"ayserezde-koydesler-korusuvi","status":"publish","type":"post","link":"https:\/\/qtmm.org\/qt\/ayserezde-koydesler-korusuvi\/","title":{"rendered":"Ayserezde k\u00f6yde\u015fler k\u00f6r\u00fc\u015f\u00fcvi"},"content":{"rendered":"\n

Er sene iy\u00fcl ay\u0131n\u0131\u00f1 birinci bazar k\u00fcn\u00fc Sudaq rayon\u0131n\u0131\u00f1 d\u00fclber manzaral\u0131 k\u00f6ylerinden biri ol\u011fan Ayserezde k\u00f6yde\u015fler k\u00f6r\u00fc\u015feler. Bu y\u0131l\u0131 olar \u015fu tedbirni endi 23-ci kere ke\u00e7irdiler.<\/p>\n\n\n\n

\u0130y\u00fclni\u00f1 birinci k\u00fcn\u00fc er y\u0131l\u0131 ol\u011fan\u0131 kibi sabadan Ayserez k\u00f6y\u00fcni\u00f1 sakinleri, em do\u011fma ayserezliler, em de 1944-te s\u00fcrg\u00fcn etilgen insanlarn\u0131\u00f1 bala ve torunlar\u0131 toplan\u0131p ba\u015flad\u0131lar. K\u00f6r\u00fc\u015f\u00fcvge yal\u0131\u00f1\u0131z Q\u0131r\u0131mn\u0131\u00f1 \u00e7e\u015fit yerlerinden degil de, Ukraina ve Rusiye, T\u00fcrkiyeden de keleler.<\/p>\n\n\n\n

Ayserezliler k\u00f6yni\u00f1 e\u00f1 qart\u0131, \u00e7oqtan-\u00e7oq torun ve torun\u00e7elerinen k\u00f6r\u00fc\u015f\u00fcvge kelgen 103 ya\u015fl\u0131 Alime qartana ve 91 ya\u015fl\u0131 \u00dcsein dedege ayr\u0131ca say\u011f\u0131 k\u00f6sterdiler.<\/p>\n\n\n\n

Q\u0131r\u0131mtatar halq\u0131 Meclisini\u00f1 reisi Mustafa Cemilev de er y\u0131l\u0131 k\u00f6r\u00fc\u015f\u00fcvge m\u0131tlaqa kelip, k\u00f6yde\u015flerini\u00f1 k\u00f6r\u00fc\u015f\u00fcvinde i\u015ftirak ete. T\u00fcrkiyeni\u00f1 \u0130stanbul \u015feer q\u0131r\u0131mtatar dernegini\u00f1 ba\u015f\u0131 Cel\u00e2l \u0130\u00e7ten, Sudaq regional meclis reisi \u0130lver Ametov, Q\u0131r\u0131m tarih\u00e7\u0131lar\u0131 birligini\u00f1 koordinator\u0131, ATR telekanal\u0131nda “Tarih sedas\u0131” programmas\u0131n\u0131\u00f1 al\u0131p bar\u0131c\u0131s\u0131 G\u00fclnara Bekirova, “Tezis” ne\u015friyat\u0131n\u0131\u00f1 direktor\u0131 Ediye M\u00fcslimova, ATR telekanal\u0131 ve QHA jurnalistleri Ayserezdeki bayramn\u0131\u00f1 musafirleri old\u0131lar.<\/p>\n\n\n\n

K\u00f6yde\u015flerine h\u0131tap etken Mustafa Cemilev olar\u011fa birlikni qaviyle\u015ftirgenleri ve do\u011f\u011fan yerlerine sadaqatlar\u0131 i\u00e7\u00fcn te\u015fekk\u00fcr bildirip, adaletni tiklevni\u00f1 uzun ve m\u00fcrekkep ceryan\u0131 aqq\u0131nda s\u00f6yledi. Meclis reisi bun\u0131\u00f1 kibi de 2012 senesi iy\u00fcn 20-de q\u0131r\u0131mtatar halq\u0131n\u0131\u00f1 aqlar\u0131n\u0131 qor\u00e7alaycaq qanun leyhas\u0131 Ukraina halq deputatlar\u0131 taraf\u0131ndan birinci oquvda qabul etilgeni boyunca mal\u00fcmat berdi.<\/p>\n\n\n\n

“\u0130leride bizni saylavlar bekley, qanun leyhas\u0131n\u0131\u00f1 taqdiri i\u015fte olarn\u0131\u00f1 neticelerine ba\u011fl\u0131d\u0131r, – devam etti s\u00f6z\u00fcni M. Cemilev. \u2013 Bu munasebetnen 2012 senesi iy\u00fcl 22 k\u00fcn\u00fc Qurultay delegatlar\u0131 nevbetteki sessiyada kelecek saylavlarda q\u0131r\u0131mtatarlarn\u0131\u00f1 pozitsiyas\u0131n\u0131 belgilegen qararn\u0131 alacaqlar”.<\/p>\n\n\n\n

Mustafa Cemilev Ayserez faallerini\u00f1 do\u011f\u011fan k\u00f6y ve sakinlerini\u00f1 tarih\u0131 aqq\u0131nda kitapn\u0131\u00f1 ne\u015firine b\u00fcy\u00fck istek ile qoltutaca\u011f\u0131n\u0131 bildirdi.<\/p>\n\n\n\n

Bayram devam\u0131nda Refat \u00c7ubarovn\u0131\u00f1 ve yerli meclisni\u00f1 teklifi boyunca umumiy hat\u0131ra resimi \u00e7ekildi. Da\u011flar ve k\u00f6yl\u00fcler em de AQ\u015eda ya\u015fa\u011fan do\u011fma ayserezli Fikret Yurterni\u00f1 \u011fayreti sayesinde \u011fayr\u0131dan tiklengen \u00e7e\u015fme yan\u0131nda ba\u015fta Ayserezde 1944 senesi may\u0131s 18-gece do\u011f\u011fanlarn\u0131\u00f1 resimi \u00e7ekildi. “Olar pek az qald\u0131, \u00e7oqlar\u0131 pek qart old\u0131qlar\u0131ndan sebep k\u00f6r\u00fc\u015f\u00fcvge kelip olamaylar”, – dedi Refat \u00c7ubarov.<\/p>\n\n\n\n

So\u00f1ra do\u011fma \u015fu k\u00f6yden ve olarn\u0131\u00f1 bala-torunlar\u0131nen beraber resimi \u00e7\u0131qar\u0131ld\u0131. Bu sene Meclis reisi Mustafa Cemilev i\u00e7\u00fcn bayram eki qat quvan\u00e7l\u0131 old\u0131. Uzun y\u0131llar devam\u0131nda o, ana-babas\u0131n\u0131\u00f1 bug\u00fcnge qadar saqlan\u0131p qal\u011fan evni ziyaret eter edi. Bu evge 1944 senesinden so\u00f1 kirip yerle\u015fken adamlar eV yan\u0131nda bulunma\u011fa izini berip, i\u00e7eri kirsetmez ediler. Ve niayet bu y\u0131l\u0131 eV kene \u00f6z saiplerine qaytt\u0131 \u2013 Mustafa Cemilev a\u011fas\u0131 Asan ile bu evge endi qanuniy saipleri olaraq ayaq bast\u0131lar. Evde analar\u0131 Mahfure Hatip \u00dcmer q\u0131z\u0131 ve babas\u0131 Abulcemilni\u00f1 fotolar\u0131 qoyul\u0131p, olarn\u0131\u00f1 hat\u0131ras\u0131na dua oquld\u0131. .<\/p>\n\n\n\n

S\u00fcrg\u00fcnlikten evel Mustafa Cemilevni\u00f1 ana-babas\u0131 devrinde bu evde Abdulcemil a\u011fa a\u00e7qan qave Ayserezni\u00f1 e\u00f1 yah\u015f\u0131 qavelerinden biri say\u0131l\u011fan. Ana-babas\u0131n\u0131\u00f1 evini sat\u0131n al\u011fan Mustafa Cemilev yerli mecliske bu evde k\u00f6y ve k\u00f6yl\u00fclerni\u00f1 tarihiy m\u00fczeyini a\u00e7maqn\u0131 teklif etti.<\/p>\n\n\n\n

Ana-babas\u0131 Ayserezden ol\u011fan Refat \u00c7ubarov da k\u00f6r\u00fc\u015f\u00fcvge kence q\u0131z\u0131 Niyara ile keldi. K\u00f6yde\u015fler \u00f6g\u00fcnde \u00e7q\u0131\u015fta bulun\u0131rken o, yaq\u0131n vaq\u0131tta s\u00fcrg\u00fcnlikten so\u00f1 klub\u011fa \u00e7evrilgen k\u00f6y camisini tamirlev i\u015flerini\u00f1 ba\u015flanaca\u011f\u0131n\u0131 haber etti.<\/p>\n\n\n\n

Bayram ne\u015fesi daa uzun vaq\u0131tqace s\u00fcrdi. Qartlarn\u0131\u00f1 tesirli ik\u00e2yelerini diqqat ile di\u00f1legen ya\u015flar ayat dersi ald\u0131lar. D\u00fclber halq na\u011fmeleri ise da\u011flar \u00fczre ya\u00f1\u011f\u0131rad\u0131.<\/p>\n\n\n\n