{"id":30452,"date":"2012-05-05T19:05:00","date_gmt":"2012-05-05T16:05:00","guid":{"rendered":"http:\/\/qtmm.org\/?p=30452"},"modified":"2022-01-21T19:13:38","modified_gmt":"2022-01-21T16:13:38","slug":"hidirlez-2012","status":"publish","type":"post","link":"https:\/\/qtmm.org\/qt\/hidirlez-2012\/","title":{"rendered":"HIDIRLEZ \u2013 2012"},"content":{"rendered":"\n

2012 senesi may\u0131s 5 k\u00fcn\u00fc Aqmescit-Ba\u011f\u00e7asaray yolun\u0131\u00f1 25-nci kilometrinde “\u015eeherezada” medeniy-eglence merkezi yan\u0131ndaki tarlada \u00f6tkerilgen q\u0131r\u0131mtatarlarn\u0131\u00f1 B\u00fct\u00fcnq\u0131r\u0131m \u00a0H\u0131d\u0131rlez bayram\u0131na Q\u0131r\u0131mn\u0131\u00f1 \u00e7e\u015fit k\u00f6\u015felerinden \u00a0 kelgen 25-30 bi\u00f1 adam topland\u0131.<\/p>\n\n\n\n

\u015eun\u0131 da qayd etmeli ki, H\u0131d\u0131rlez Q\u0131r\u0131mda ya\u015fa\u011fan \u00e7e\u015fit millet vekilleri, T\u00fcrkiye, Zaporojye, Herson vil\u00e2yetleri, Kiyev ve Odessa \u015feerlerinden kelgen insanlarn\u0131 birle\u015ftirdi. Bayramn\u0131\u00f1 tantanal\u0131 a\u00e7\u0131l\u0131\u015f merasiminde \u00a0Q\u0131r\u0131m \u00a0musulmanlar\u0131n\u0131\u00f1 m\u00fcftisi ac\u0131 Emirali Ablayev \u00a0toplan\u011fanlarn\u0131 hay\u0131rlap, ke\u00e7mi\u015flerni\u00f1 ruhuna ve y\u0131ln\u0131\u00f1 bereketli olmas\u0131 i\u00e7\u00fcn dua oqud\u0131.\u00a0<\/p>\n\n\n\n

Bayram i\u015ftirak\u00e7ilerini bun\u0131\u00f1 kibi de \u00a0Q\u0131r\u0131mtatar halq\u0131 Meclisini\u00f1 reisi Mustafa Cemilev, B\u00fct\u00fcnd\u00fcnya q\u0131r\u0131mtatarlar kongressini\u00f1 reisi \u00a0Refat \u00c7ubarov, T\u00fcrkiye ba\u015f nazir reisini\u00f1 muavini Ali Babacan ve T\u00fcrkiyeni\u00f1 Ukrainadaki Toluvek\u00e2letli ve Vefqulade \u00a0El\u00e7isi Mehmet Samsar hay\u0131rlad\u0131lar.\u00a0<\/p>\n\n\n\n

“Tezden may\u0131s 18 \u2013 halq\u0131m\u0131z\u011fa facia ve azap ketirgen \u00a0k\u00fcn yaq\u0131nla\u015fa, – dep ba\u015flad\u0131 \u00f6z \u00e7\u0131q\u0131\u015f\u0131n\u0131 Mustafa Cemilev. \u2013 L\u00e2kin ayatta tek qara k\u00fcnler degil de, bayramlar da ola. Bu tabiiydir. Bug\u00fcn biz m\u0131nda halq\u0131m\u0131zn\u0131\u00f1 e\u00f1 qadimiy bayramlar\u0131ndan biri ol\u011fan H\u0131d\u0131rlez bayram\u0131n\u0131 qayd etmek i\u00e7\u00fcn topland\u0131q. Bars\u0131n, bu k\u00fcn dostluq ve birlik bayram\u0131 \u00a0olsun, – dedi Mustafa Cemilev. – Biz \u00f6z Vatan\u0131m\u0131zda \u00f6z urf-adetlerimizni \u00a0\u011fayr\u0131dan timklemek kerekmiz. Bu sene bayram\u011fa pek \u00e7oq adam ve bilhassa \u00a0\u00e7oq gen\u00e7 ve balalar kelgenine sevindim!”.\u00a0<\/p>\n\n\n\n

Halq\u0131m\u0131zn\u0131\u00f1 ananesine k\u00f6re \u015fu yerde sanada qalaqay t\u0131\u011f\u0131rt\u0131ld\u0131. Bu \u015ferefli vazife Milliy Meclisni\u00f1 reisi Mustafa Cemilevge i\u015fan\u0131ld\u0131.\u00a0T\u00fcrkiye ba\u015f nazir muavini Ali Babacan bayram i\u015ftirak\u00e7ilerini b\u00fct\u00fcn t\u00fcrk halq\u0131 ad\u0131ndan sel\u00e2mlad\u0131 ve hay\u0131rlad\u0131.\u00a0\u00a0<\/p>\n\n\n\n

“Bug\u00fcn m\u0131nda toplan\u0131rkenmiz, birlik-beraberligimizni ve \u00a0yar\u0131nki k\u00fcn\u00fcmizge eminligimizni numay\u0131\u015f etemiz. Bu bayramn\u0131 sizler \u2013 g\u00fczel Vatan\u0131m\u0131zn\u0131\u00f1 \u00e7e\u015fit k\u00f6\u015felerinden kelgen, Ukraina vil\u00e2yetleri ve \u015feerleri em de \u00e7et devletlerden kelgen musafirler yara\u015ft\u0131rd\u0131\u00f1\u0131z, – dep muracaat etti Refat \u00c7ubarov. \u2013 Men yerli ve regional meclis, icadiy kollektivlerni\u00f1 vekilleri, i\u015f adamlar\u0131, matbuat vastalar\u0131n\u0131\u00f1 hadimlerine bayramn\u0131 az\u0131rlav ve ke\u00e7ir\u00fcvge qo\u015fqan isseleri i\u00e7\u00fcn te\u015fekk\u00fcr bildirmek isteyim. Bilem ve eminim ki, eki aftadan so\u00f1 may\u0131s 18 k\u00fcn\u00fc \u00a0Aqmescitni\u00f1 merkeziy meydan\u0131nda biz kene b\u00f6yle birlikli olup, q\u0131r\u0131mtatar halq\u0131 genotsidini\u00f1 qurbanlar\u0131n\u0131 a\u00f1arm\u0131z, \u00a0q\u0131r\u0131mtatar halq\u0131 aq-uquqlar\u0131n\u0131\u00f1 \u011fayr\u0131dan tiklenilmesini talap etermiz”.\u00a0\u00a0<\/p>\n\n\n\n

“Menim q\u0131ymetli semetde\u015flerim, men bug\u00fcn 1968 senesi \u00c7\u0131r\u00e7\u0131qta \u00a0bizler bu bayram\u0131m\u0131zn\u0131 qayd etmek i\u00e7\u00fcn toplan\u011fan\u0131m\u0131zda, bizlerni sopalap, \u00fcst\u00fcmizge suv t\u00f6k\u00fcp quvd\u0131lar, dep hat\u0131rlad\u0131 milliy areket veteran\u0131 \u00a0Ay\u015fe Seytmuratova. \u2013 O zaman biz tasavur bile etmedik ki, k\u00fcn kelip bayram\u0131m\u0131zn\u0131 tuv\u011fan yurtum\u0131zda b\u00f6yle y\u00fcksek seviyede ke\u00e7irirmiz, dep.\u00a0<\/p>\n\n\n\n

Qararla\u015ft\u0131r\u0131l\u011fan\u0131na k\u00f6re k\u00fcn devam\u0131nda bayram alan\u0131nda \u00e7e\u015fit yar\u0131\u015flar, musabaqa ve kontsertler old\u0131. \u015eus\u0131 quvan\u00e7l\u0131 ki, \u00a0Q\u0131r\u0131mn\u0131\u00f1 \u00e7e\u015fit rayon ve qasabalar\u0131ndan \u00a0kelgen delegatsiyalarn\u0131\u00f1 erk\u00e2n\u0131nda \u00a0akimiyet organ\u0131 reberleri ve regional meclis vekilleri da bar edi. Sport yar\u0131\u015flarn\u0131\u00f1 neticeleri boyunca \u011falipler belgilenip, mahsus muk\u00e2fatlarnen taqdirlendiler. \u00a0At qo\u015fular\u0131nda ye\u00f1genlerni \u015fahsen Q\u0131r\u0131m Nazirler \u015euras\u0131n\u0131\u00f1 reisi Anatoliy Mogil\u00f6v muk\u00e2fatlad\u0131.\u00a0<\/p>\n\n\n\n

Ayr\u0131 meydan\u00e7\u0131qlarda gen\u00e7 futbolc\u0131lar \u00f6z \u00e7empionat\u0131n\u0131 ke\u00e7irdiler. S\u0131ra-s\u0131ranen qurul\u011fan \u00e7ad\u0131rlarda halq ustalar\u0131 \u00f6z i\u015flerini numay\u0131\u015f ettiler. Milliy yemeklerni \u00a0belli a\u00e7\u015f\u0131lar taqdim ettiler.\u00a0<\/p>\n\n\n\n

Bar\u0131\u015f\u0131ql\u0131q temsilleri ol\u011fan g\u00f6gercinlerni k\u00f6kke u\u00e7uruv merasimi bayram\u011fa ayr\u0131ca t\u00fcs \u00a0berdi. \u00d6z ana topra\u011f\u0131\u00f1da bar\u0131\u015f\u0131ql\u0131q i\u00e7ersinde ya\u015famaq b\u00fct\u00fcn halq ve insanlarn\u0131\u00f1 e\u00f1 birinci istegidir. \u00a0<\/p>\n\n\n\n