{"id":24446,"date":"2011-04-04T20:29:00","date_gmt":"2011-04-04T17:29:00","guid":{"rendered":"http:\/\/qtmm.org\/?p=24446"},"modified":"2022-01-18T20:34:06","modified_gmt":"2022-01-18T17:34:06","slug":"ay-serezde-koydesler-korusuvi","status":"publish","type":"post","link":"https:\/\/qtmm.org\/qt\/ay-serezde-koydesler-korusuvi\/","title":{"rendered":"Ay-Serezde k\u00f6yde\u015fler k\u00f6r\u00fc\u015f\u00fcvi"},"content":{"rendered":"\n

2011 senesi iy\u00fcl 3 k\u00fcn\u00fc Qaps\u0131hor k\u00f6y\u00fcni\u00f1 yan\u0131nda yerle\u015fken qadimiy, \u011fayet d\u00fclber Ay-Serez k\u00f6y\u00fcni\u00f1 sakinleri, olarn\u0131\u00f1 evl\u00e2tlar\u0131 ve torunlar\u0131 k\u00f6r\u00fc\u015ftiler.
80-nci senelerni\u00f1 so\u00f1lar\u0131ndan itibaren ke\u00e7irilgen ve endi ananeviy ol\u011fan bu k\u00f6r\u00fc\u015f\u00fcvler \u00fcyken ve \u00f6sip keleyatqan nesil aras\u0131ndaki ba\u011fn\u0131\u00f1 \u00fcz\u00fclmegeni, aksine ep pekingeninden, ayserezliler nerede ya\u015fa\u011fanlar\u0131ndan qatiy nazar tuv\u011fan k\u00f6ylerini unutma\u011fanlar\u0131ndan del\u00e2let bermekte.<\/p>\n\n\n\n

Bu sene k\u00f6r\u00fc\u015f\u00fcvge Q\u0131r\u0131mdan ve Q\u0131r\u0131mn\u0131\u00f1 t\u0131\u015f\u0131ndan 400-den ziyade adam topland\u0131. Ay-Serez k\u00f6y meclisi, q\u0131r\u0131mtatar halq\u0131 milliy areketi veteranlar\u0131n\u0131\u00f1 k\u00f6r\u00fc\u015f\u00fcvge etrafl\u0131ca az\u0131rlan\u011fanlar\u0131, do\u011fma ayserezlilerni\u00f1 maddiy yard\u0131mlar\u0131 sayesinde k\u00f6yde\u015fler k\u00f6r\u00fc\u015f\u00fcvi \u015fe\u00f1 ve unut\u0131lmaz teessuratlar qald\u0131r\u011fan g\u00fczel bir bayram\u011fa \u00e7evirildi.<\/p>\n\n\n\n

\u00d6z k\u00f6yde\u015flerinen k\u00f6r\u00fc\u015fmek i\u00e7\u00fcn k\u00f6r\u00fc\u015f\u00fcvge Q\u0131r\u0131mtatar halq\u0131 Meclisini\u00f1 reisi Mustafa Cemilev de te\u015frif buyurd\u0131. \u00d6z \u00e7\u0131q\u0131\u015f\u0131nda Mustafa Cemilev k\u00f6yde\u015flerini birlikni saqla\u011fanlar\u0131, k\u00f6yge sevgi ve \u00fcrmet ile yana\u015fqanlar\u0131 i\u00e7\u00fcn te\u015fekk\u00fcr bildirip, ayn\u0131 zamanda k\u00f6yni\u00f1 evelki q\u0131yafeti ve \u015f\u00fcretini \u011fayr\u0131dan tiklemek boyunca areketlerni birle\u015ftirmekni teklif etti. Mustafa Cemilev k\u00f6yde\u015flerini\u00f1 er bir k\u00f6r\u00fc\u015f\u00fcvinde i\u015ftirak etmege, ana-babas\u0131n\u0131\u00f1 bug\u00fcngece saqlan\u0131p qal\u011fan evini ziyaret etmege t\u0131r\u0131\u015fa.<\/p>\n\n\n\n

Ay-Serezlilerni\u00f1 ananeviy k\u00f6r\u00fc\u015f\u00fcvine Amerika Qo\u015fma \u015etatlar\u0131nda ya\u015fa\u011fan milliy areket i\u015ftirak\u00e7isi do\u011fma ayserezli Fikret Yurter de refiqas\u0131 ile keldi. O, da k\u00f6yde\u015flerini samimiy sel\u00e2mlad\u0131 ve k\u00f6yni \u011fayr\u0131dan tiklemek, tarihiy asabal\u0131\u011f\u0131m\u0131zn\u0131 kelecek nesillerge qald\u0131rmaq kerekligini qayd etti.<\/p>\n\n\n\n

K\u00f6yni\u00f1 evelki q\u0131yafetini \u011fayr\u0131dan tiklemek, saqlamaq ve qor\u00e7alamaq meseleleri muzakeresi devam\u0131nda Ay-Serez k\u00f6y\u00fcni\u00f1 sakinleri Milliy Meclis reisinden k\u00f6yde saqlan\u0131p qal\u011fan eski camini qaytar\u0131p almaq ve qanuniyle\u015ftirmek boyunca vesiqalarn\u0131 resmiyle\u015ftir\u00fcvde ameliy yard\u0131m k\u00f6stermesini rica ettiler. Vesiqalar az\u0131r ol\u011fan\u0131nen k\u00f6yl\u00fcler camini\u00f1 tamirini ba\u015flamaq meram\u0131ndalar. Mustafa Cemilev mezk\u00fcr meseleni\u00f1 \u00e7eziminde k\u00f6yde\u015flerine elinden kelgen yard\u0131mn\u0131 k\u00f6sterecegini i\u015fand\u0131rd\u0131.<\/p>\n\n\n\n

Mal\u00fcmat i\u00e7\u00fcn:<\/em>\u00a0 NKVD mal\u00fcmatlar\u0131na k\u00f6re 1944 senesi may\u0131s 18-de Ay-Serezden 1626 q\u0131r\u0131mtatar\u0131 s\u00fcrg\u00fcn etildi.<\/p>\n\n\n\n