Haberler

Qırımtatar milliy bayraq künü munasebetinen Qırımtatar Milliy Meclis reisiniñ hayırlavı 26 ilk yaz ayı 2018 senesi

Sayğılı dostlar!

26 iyün - Qırımtatar milliy bayraq künü. 

Aynı bu künü, lâkin 27 yıl evel, 1991 senesiniñ iyün 26-ncı künü Aqmescitte, aman-aman 74 yıllıq mecburiy aradan soñra, Qırımnıñ tamır halqınıñ yekâne aliy temsilci organı - Qırımtatar Milliy Qurultaynıñ işi yañıdan başlatıldı.

Ğayırdan tiklenilgen Qurultayda qabul etilgen ilki qararlarından biri “Milliy bayraq ve milliy gimn aqqında” qararı oldı. Qararda şu satırlar yer aldı: 

“1917 senesindeki Qurultaynıñ varisi olaraq ve qırımtatar halqınıñ milliy devletçilik ananesini devam eterek, Qurultay şu qararnı tasdiqlay: Qırımtatar halqınıñ milliy bayrağı olaraq bayraqnıñ diregine yaqın üst köşede altın tamğalı ve kök tüste tüz köşeli qumaç sayılmalı…” 

Halqnı temsil etken müessiseni 1991-de ğayırdan tiklegen soñ qırımtatar halqı öz özüni eñ yüksek seviyede idare etebilgenini ve olğun, bir bütün halq olğanını kösterdi. 

Birinci Qurultaynıñ vaqıtından bu küngece altın tamğalı kök bayraq, öz Vatanına sadıqlıqnıñ, tamır halqınıñ aqlarını ğayırdan tiklev ve qorçalavda sebat ile fedakârlıqnıñ alâmetidir. Dünya ile munasebetlerinde tınçlıq, adalet ve zorbalıqsız areketniñ köstergiçidir. 

2014 senesi 26 fevral künü on beş biñden ziyade qırımtatarı ve ukrayinler, Milliy Meclisniñ çağıruvına cevap berip Qırım Yuqarı Şurasınıñ binası ögüne qırımtatar ve ukrayin devlet bayraqları ile çıqaraq Ukrayin devletiniñ bütünligini qorçaladılar. 

İşğalniñ dört yılı devamında qırımtatar halqından ketken qurbanlar olsun, qırımtatarlarğa qarşı alıp barılğan eñ acımasız repressiyalar olsun, iç biri Qırımnıñ tamır halqınıñ serbest iradesi ve ruhunı qırmadılar. Qırımtatarları öz Vatanına, milliy deger ve qıymetlerine, devletine sadıq qalmaqtalar. 

Bugün bir çoq memlekette qırımtatar milliy bayraqnıñ tantanalı köterilüvinen bağlı merasimler keçirilecek. Qırımtatar bayrağına olğan öz ürmetini diplomatlar, siyasetçiler ve cemaat erbapları numayış etecekler. 

Lâkin, bizler içün eñ müim olğanı - Rusiye Federatsiyası vaqıtınca işğal etken Qırımnıñ bütün yerlerinde milliy areketniñ faalcileri tarafından biñlerce qırımtatar bayraqlarnıñ köterilüvidir. 

Bugün Qırımda, şu bayram kününde ve diger künlerde de bayraq kötergen bütün vatandaşlarımızğa büyükten büyük teşekkürler bildiremiz. 

Eñ yaqın kelecekte rus işğalcilerinden azad etilgen Qırımda qırımtatar milliy bayrağı, Ukrayina devleti erkânında Qırımtatar Muhtar Cumhuriyetiniñ bayrağı olaraq özüne lâyıq yerni tapacağından iç bir kimse şübelenmesin. 

Qırımtatar Milliy Meclisi adından epiñizni Qırımtatar milliy bayraq kününen hayırlayım! 

Yaşasın Qırım!

Yaşasın qırımtatar milleti!

Kökke yüksetilgen milliy bayrağımız iç tüşmesin!

Ukrayina halqına şan-şüretler olsun!

Ukrayinağa şan-şüret olsun!

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.