Haberler

Server Karametovnıñ vefatı munasebetinen taziye 24 ilk yaz ayı 2018 senesi

 

Bugün qırımtatar halqı daa bir qaramanını - Server ağa Karametovnı soñki yolculıqqa ozğardı..

Rusiyeniñ arbiy istilâsı ve Qırımnıñ işğalinen bağlı soñki dört yılnıñ facialı adiseleri neticesinde küreşimizniñ ög saflarına öz şerefini ve halqına sadıqlıqnı qorçalağan birçoq insan çıqtı. 

Rus işğalcileri qarşısında qorqmağan Server ağa, öz alçaqgöñülliligi ve dürüstligi sayesinde başta kendi halqınıñ ve dünya boyunca birçoq insannıñ sevgi ve ürmetini qazandı. 

Körüşüvlerde oña selâm berip ve ürmet ile qolunı alıp, genç ve esli yaşta olğan vatandaşlarımız "Bizim qartbaba..." - dep ayta ediler. 

Server ağa vaqıtınca işğal etilgen Qırımdan birqaç sefer Kiyevge de kelgen edi. Qırımtatar Milli Meclisinde keçirilgen toplaşuvlarda iştirak etip, sözge çıqqan edi. Qırımtatar halqınıñ milli menfaatlerini qorçalav meselelerinde oña has israrlıq ve qatiylik, subetdeşlerinde er daim samimiy ürmetni doğura edi. 

Qırımtatar Milli Meclisi adından başta Server ağanıñ qorantası, yaqınları ve umumen bütün qırımtatar halqına bu ağır ğayıp sebebinden eñ teren taziyelerimni bildirem. 

Allah rahmet eylesin!

Refat Çubarov 
Qırımtatar Milli Meclis Reisi
Kyiv, 24 iyun 2018s.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.