Haberler

Ali Alimovnıñ vefatı munasebetinen taziye 25 qara qış ayı 2018 senesi

 

Elvida, ustaz!

Halqımız milliy sanat erbabı Ali Alimovnen vedalaştı.

Qırımnı kederli haber sardı: Vatanına avdet olğanından berli öz doğmuş Aqmescit şeerinde yaşağan, mında 1990 senesi çoq belli "Uçan-Su" ve "Fidanlar" gençler ve bala-ösmür ansambllerni meydanğa ketirgen, bütün bu zaman içinde olarnıñ bediy reberi olğan büyük oyuncı, horeograf, oca, pedagog, alicenap insan Ali ağa Alimov bu faniy dünyanı terk etti.

Keçken sene 14 martta keniş cemaatçılıq ve Ali ağanıñ yüzlernen talebeleri onı müteber 90 yaşınen hayırlağan, eñ eyi tilekler seslendirgen ediler. Milliy sanatımıznıñ eñ körümli sımalarından olğan ustaznıñ ömür yolunı hatırladılar. 17 yaşında sürgünlik qarsamba-felâketlerini başından tolusınen keçirgen Ali ağa oyuncı olmazdan evel ayaqapçı, aydavcı olıp çalıştı. Sanağa çıqqan soñ ise oyunğa doğğan sevgi ve özündeki istidat onı bu saada meşur usta ve birazdan ustaz ettiler.

Qırımğa qaytmağa yasaq olğan devirniñ büyük qısmını o, Vatanğa yaqınca olmaq içün, 22 yıl Odessada yaşadı. Öz sevimli zenaatınen oğraşır eken, "dağ oyunları", dep, horeograf ve baletmeyster sıfatında milliy oyunlarımıznıñ inkişafı üzerinde de çalıştı. Bu işler oña Qırımda doğmuş sanatımıznı tiklemekte çoq yardım etti.

Oca olaraq yaş nesilge özgün oyunlarımızğa sevgi aşlağan Ali ağa öz pedagogik faaliyetinde özüne has printsiplerge riayet etti: ansambllerge kelgen balalardan kimseni qaytarmadı, kimseniñ göñülni qırmadı, er birine öz torunları kibi munasebette bulundı. Talebeleri de oña teren sevgi ve sayğınen cevaplandılar. "Uçan-Su" ve "Fidanlar"nıñ ananege çevirilgen baar kontsertleri milliy sanatımıznıñ muhteşem bir ananesine çevirilgen edi.

Teessüf ki, olıp keçken siyasiy vaqialar ustaznıñ icadına menfiy tesir ettiler. O, sağlığı çete tursın, eñ-evelâ müit deñişkeni sebebinden sevimli zenaatı ve onıñ evlâları olğan ansambllerdeki faal işlerinden çetleşti.

Ali ağa Osman oğlu Alimov vefat etkeni munasebetinen onıñ ömür arqadaşı Meva hanımğa, oğlu Ebazer beyge, qızı Ülkera hanımğa, torunlarına samimiy ve teren taziyemizni bildiremiz, cümle yaqınlarına baş sağlığı tileymiz.

Alla rahmet eylesin.

 

Qırımtatar Milli Meclis azaları
VI Milliy Qurultaynıñ delegatları
Cemaat vekilleri ve dostları.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.