Haberler

Ahtem Çiygozniñ ükümini açıqladılar 11 ilk küz ayı 2017 senesi

Qırımnıñ güyâ "Yuqarı mahkemesi" Qırımtatar Milliy Meclisniñ reis muavini Ahmet Çiygozge qarşı qabaatlavğa, yani prokuratura tarafından 8 yıllıq apis cezasına tolusınen qol tuttı. 

Ahtem Çiygoz, onıñ advokatı Mıkola Polozov ve ömür arqadaşı Elmira Ablâlimovanen beraber mahkemeniñ qararını SİZO-da bulunıp video-bağ vastısınen bildiler.  

150 mahkeme oturışından soñra, mahkemeciler avgust 1 künü Ahtem Çiygozniñ işi boyunca taqiqatnı yekünlediler. 

Avgust 9 künü Ahtem Çiygoz öz soñki sozünde "mahkemede", oña berilecek cezanı bütün qırımtatar halqı adına qabul etecegini ayttı. 

Qırımtatar Milliy Meclisniñ reis muavini Ahtem Çiygoz, 2015 senenisiniñ yanvar ayında, Ukrainanıñ topraq bütünligine qol tutmaq içün Qırım Yuqarı Şurasınıñ binası ögünde 26 fevralde teşkil etilgen mitingte iştirağı sebebinden yaqalandı. O vaqıt mitingçilerge rus tarafdarları, ve hususan "Russkoye yedinstvo" firqasınıñ destekçileri qarşı çıqtılar. İşğal etilgen Qırımnıñ Rus ükümeti, Çiygozni kütleviy çatışmalar sebebinden qabaatlay.  

Ukrayina Prezidenti Petro Poroşenko, Qırımtatar Milliy Meclisniñ reis muavini Ahtem Çiygozniñ apis cezası qararına nisbeten öz noqtai nazarını bildirdi. Bunı o Facebook içtimaiy ağında yazdı. 

"Ahtem Çiygozniñ meselesi - eñ yüksek seviyede, Birleşken Milletler Teşkilâtı tarafından işğalci olaraq qabul etilgen Rusiyeniñ yañı mahkeme ükümi. 

Azatlıqnı qanundan tış şekilde sıñırlamaq mümkün, lâkin irade ve aqiqat iç bir zaman sındırlmaz! Başqasınıñ toprağını basıp almaq mümkün, lâkin bu topraq, azatlıqqa qavuşmağancek ayaq astında yanacaq ve yaqacaq"

Ukrayina Tışqı işler nazirligi de öz nevbetinde Rusiye Federatsiyasına, Ahtem Çiygozniñ üküminen bağlı öz qatiy narazılığını bildirdi. Bunı Twitter-de nazirlikniñ matbuat sözcüsi Maryana Betsa açıqladı. 

 

 

Bu yerde bugün mahkemede Ahtem Çiygozge berilgen ukümniñ yekünleyici qısmını diñleybilesiñiz. Mahmekeniñ tolu qararı ileride advokatlarğa teslim etilecek.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.