Haberler

Litva eyetiniñ ziyareti 07 ilk küz ayı 2017 senesi

Litva Seyminiñ spikeri Viktoras Pranckietis reberligindeki eyet Herson vilâyetinen işğal etilgen Qırım arasındaki idariy sıñırnı ziyaret etti. 

Eyet  terkibine parlament yolbaşçısı Viktoras Pranckietis, deputatlar, Litvanıñ Mudafaa naziri, Litvanıñ Ukrayina elçisi ve diger resmiy şahıslar kirdiler. Olarğa Milliy Meclis reisi Refat Çubarov, Herson vilâyet yolbaşçısı Andriy Gordeyev ve vilâyet şurasınıñ başlığı Vladislav Menger refaqat etiler.

Aliy musafirlerni Geniçesk rayonı devlet idaresiniñ reberi Oleksandr Vorobyov ve Meclis azaları qarşılap aldılar. 

Viktoras Pranckietis jurnalistlerniñ suallerine cevap bergende: "Qırım sıñırına, Rusiyeniñ basqıncı areketlerini qabul etmeymiz ve iç bir vaqıt tanımaycaqmız, dep aytmaq içün keldik" - dedi. 

O qayd etkenine köre, olar, Sovetler birligi tarafından Litvanıñ istilâsınen razı olmağan Amerika Birleşik Devletlerine minnetdarlar. "Bu sebepten biz bugün aynı areketni Ukrayina içün yapmağa azırmız", dep qoştı Pranckietis. 

Oleksandr Vorobyov öz nevbetinde şunı bildirdi: "Bizim rayonğa kelüvleri, evelden berli qırımtatarlarınen olğan dostluq, medeniyet ve tarih munasebetlerinen bağlı. Litvada, çoq horluq körgen bu halqnıñ büyük diasporası yaşay". 

Ziyaret esnasında Viktoras Pranckietis Qırımnıñ tışındaki Ukrayina topraqlarında ilki qırımtatar milliy sınıfnıñ açılış merasimine de qoşuldı. 

 

Foto - Akim Seytablayev

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.