Haberler

Qırımtatar Milli Meclis reisi Refat Çubarov ile Türkiye Cumhuriyeti Başnazirligi Yurt tışındaki türkler ve aqraba topluluqları idaresiniñ reis muavini Sait Yusuf bey ile körüşüvi. 22 arman ayı 2017 senesi

21 avgust künü Milli Meclisniñ binasında Meclis reisi Refat Çubarov ve Yurt tışındaki türkler ve aqraba topluluqları idaresiniñ eyeti arasında körüşüv olıp keçti. İdareni müdir muavini Sait Yusuf temsil etti. Tedbirde ayrıca Qırım müftisi Ayder Rustamov da iştirak etti.

Körüşüv devamında müdir muavini bilgi berip, Türkiye Cumhuriyeti endi 25 yıldan berli çeşitli memleketlerden studentlerni qabul etip, olarğa aliy oquv yurtlarında tasil ve devlet stipendiyası kibi imkânlarnı temin etkenini añlattı. Mezkür müdirlik şimdiki vaqıtta, bir çoq memlekette, ve hususan Ukrayinada da, mezunlar cemiyetlerni teşkil etip, bu programmanıñ neticelerini talil ete. Berilgen malümatqa köre, er yıl 40-50 genç Ukrayina vatandaşı Turkiyede oqumağa aq qazanalar. Studentlerniñ ekseriyeti ise qırım tatarları.

Qırımtatar Milli Meclis reisi kendi çıqışında Türkiyede oqumağa istegen qırımlı yaşlarğa ileride de destek köstermege çağırdı. Refat Çubarov qayd etkenine köre, Rusiye Federatsiyası tarafından Qırımnıñ işğali bu ceryanğa keder etmemeli. Bunnen beraber o, öz tuvğan cemiyetine azamiy faydanı ketirmek içün Türkiye mezunlarınıñ mutlaqa öz vatanlarına, halqınıñ yanına qaytmağa mecbur olğanlarına dair fikirni bildirdi.

Sait Yusuf ise öz nevbetinde şunı beyan etti ki, qırımtatar yaşlarınıñ er yıl Türkiyege barıp, yüksek seviyeli aliy oquv yurtlarında tasil aluvları içün Turkiye Cumhuriyeti bütün kerekli şartlarnı yerine ketirmekte. Bunnen beraber o, bu ceryannıñ semereligini arttırmaqnıñ emiyetini qayd etti. Çünki gençler oquvnı bitirip ve öz memleketlerine qaytıp çalışmağa başlağan soñ belli bir muvafaqiyet aqqında söz yürstemege mümkün, dedi Sait Yusuf.

Körüşüvniñ soñunda türk eyyeti öz hatıra ediyelerini taqdim etti.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.