Haberler

Ahtem Çiygoz: “Şu, sözde “mahkemeni”, aqqı olmağan işğalci devlet alıp bara” 10 arman ayı 2017 senesi

Qırımtatar Milli Meclis reis muavini Ahtem Çiygozniñ “Qırım yuqarı mahkemesiniñ” qanunsız oturışında aytqan “soñki sözü”

Anam vefat etmezden evel özünden afu soradım, çünki oğlusı olaraq omüriniñ soñki ağır künlerinde onıñ yanında bulunamadım. Bütün küçüni toplap maña: “Boyle oğul terbiye etkenim içün ğururlanam!”, - dedi.  

Ne yapqan olsam da, şimdi ne qadar qıynalsam da, ölü mi, tiri mi çıqacağımnı bilmesem de men, areketlerim, fikirlerim, sözlerim insan olaraq, qırımtatarı olaraq meni masqara etebilir, meni Qırımtatar Milli Mecliske saylağan, maña işanğan halqım utanabilir, dep qorqam. 

“Ant etkenmen, söz bergenmen millet içün ölmege…”

Bu antnı men Meclisniñ diger azalarınen beraber, devletçiligimizniñ qadimiy merkezi, halqımıznıñ timsali olğan Hanlar Sarayınıñ azbarında bir tizimizni çökip ve milliy bayrağımıznı öpüp seslendirdik. 

Bir qaç sürgünniñ, aqiqatta ise soyqırımnıñ sebebi - Rus imperiyasınıñ, devamında ise Sovetler Birliginiñ, Qırımnı qırımtatarlardan temizlemek ve halqımıznı yoq etip, onıñ tarihını silmek istegi edi. Er bir qırımtatarı bu sözlerni aytqanda yemin ete ve  kelecek nesiller ögünde öz halqınıñ takdiri, Vatannıñ taqdiri içün mesüliyetni issete. 

Halq öz yetekçilerini özü saylay. Halqnıñ iradesini iç bir şey yıqmadı, nesilden nesilge miras olıp keçken milliy menlikni, Vatanğa ve topraqqa sevgini yoq etip olamadı. Qırımtatarlar içün, diger milletler içün olğanı kibi, “vatandaşlıq borcu”, “vatanperverlik”, “milli şeref” degen ibareler ayrı qıymet taşıy. 

2014 senesi fevral 26 künü qırımtatarlar ve diger Ukrayina vatandaşları Ukrayina topraqlarnıñ bütünligini telüke altına alğan vaziyetke qarşı çıqıp, siyasiy iylebazlar ve iqtidar adına dolandırıcılarğa seslenip olardan cevap bermege talap etiler.  

Daa soñra, Qırımnıñ işğali esnasında qırımtatarlar diger Ukrayina vatandaşlarınen beraber, bu quvetlerniñ bir çoq tahriklerine, insan qaçıruvlarına, öldürüvlerge, cinayetlerge, tintüvlerge, apis cezalarına, matem merasimlerniñ yasaq etilüvine, eñ ufaq narazılıq areketleri sebebinden berilgen büyük para cöremelerine, keñ sürette işletilgen basqıncı usullarğa baqmadan öz vatandaşlıq vazifelerini yerine ketirmege devam ettiler ve eteler. 

İşte bu al şu küçlerni raatsız ete, olarnıñ açuvını qozğalay ve qabaatsız insanlar üzerinde “mahkemelerni” alıp barmağa zorlay. Tarihqa “26 fevral davası” olaraq keçken siyasiy dava endi eki yıldan ziyade devam ete. Davanıñ maqsadı, şübesiz, qırımtatarlarnı qorquzmaq, öz aqlarını qorçalav oğruna olarnıñ faalciligini boğıp, Qırımnıñ qanunsız istilâsını tanımağan dünya toplulığı ve Ukrayinanıñ destegini mümkün olğan derecede azlatmaq. Erkes içün belli ki, Ahtem Çiygozğa qarşı cinaiy iş degen şey yoq. Fevral 26 künü Qırımtatar Milli Meclisi ilân etken tınç mitingte yüz bergen vaqialarnıñ sebepçisi, ileride Qırımnıñ arbiy işğaline yol açqan küçler oldı. Yani, aslında, ihanet etken, Ukrayinanı parçalamağa niyeti ve ğayesi olğan, insan qaçırıp öldürgen, özlerine qanundan tış üküm ve akimiyet aqqını bergenlerni degil, öz memleketini ve halqara qanun-qaidelerni qorçalağanlarnı mahkeme eteler.   

Şu, sözde “mahkemeni”, aqqı olmağan işğalci devlet alıp bara. Böyle vaziyette, bu davanı sımarlağanlarnıñ aqiqiy niyetleri belli olğanı içün, mahkemeniñ bir-de-bir tarafsızlıq ve mustaqilligi bahis mevzusı bile degil. Demek, Vatanımnı basıp alğan Rusiye Federatsiyasınıñ bu adliyeviy qararını, qırımtatar halqına berilgen kibi qabul etmek baş yazımdır. 

Avgust 9 künü, 2017 s. Aqmescit, Rusiye Federatsiyası tarafından muvaqqaten işğal etilgen Qırım. 

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.