Haberler

Halqara tamır milletler künü. Matbuat konferentsiya 08 arman ayı 2017 senesi

 

Halqara tamır milletler künü arfesinde bugün, avgust 8-de, Kyivde mahsus matbuat konferentsiya olıp keçti. Konferentsiyada maruzacı olaraq Qırımtatar Milli Meclis reisi Refat Çubarov, İnformatsion siyaseti boyunca nazirniñ birinci muavini Emine Ceppar ve Siyasiy araştırmalar boyunca mustaqil ukrayin merkezniñ mütehassısı Yuliya Tışçenko iştirak ettiler.

Tedbirniñ evelinde kütleviy haber vastalarnıñ temsilcilerine İnformatsion nazirligi tarafından azırlanğan bir-qaç qısqa videolı malümat kösterildi. Bu filmlerniñ ileride ukrayin televizion kanallarında yayın etilecegi aqqında beyan etildi.

Sözge çıqqan Yuliya Tışçenko, Ukrayinada ve dünyada qabul etilgen tamır halqlarnıñ aq ve uquqlarınen bağlı qanunlar, ve bu aqta Rusiye qanunlarnıñ hususiyetleri aqqında bilginen paylaştı, ve, bilhassa, anda tek "az sayılı milletler" ibaresiniñ mevcut olğanını bildirdi.

Refat Çubarov öz nevbetinde, aynı şu künde 9 yıl evel Rusiyeniñ Gürcistanğa arbiy ucüm etkenini hatırlatıp, o vaqıtta Meclisniñ nevbetten tış toplaşuvında qırımtatar halqınıñ telükesizligi mevzusı nasıl muzakere etilgenini ikâye etti. Hususan, buña beñzegen basqıncılıq areketi Qırımğa yapılğanı taqdirde, qırımtatar halqnıñ saqlanıp qorunmasını kim temin etecegi suali kün tertibinde edi. Bunnen beraber Meclis reisi şunı qayd etti ki, o zamannıñ ukrayin devleti qırımtatarlarğa qarşı öz areketsizligi ve pervasızlığınen, bir qısım topraqlarınıñ işğalini teşviq etti.

Refat Çubarov öz çıqışınıñ ekinci qısımında, "Qırımtatar halqınıñ statusı ve Ukrayina Anayasasına kirsetilecek deñişüvler" aqqında qanunı üzerinde devam etken çalışmalarnı da hatırlattı. "Bu qanun leyihası sentyâbrde açılacaq Ukrayina Yuqarı Şurasınıñ sessiyasında baqılacaq. Ve biz ister edik ki, bu yılnıñ soñuna qabul etilgen qanunnen çıqayıq. Ukrayinanıñ içki vaziyetinde tertip-nizamnıñ qaviyleşmesi, Qırım yarımadası üzerinde ukrayin akimiyetiniñ küçlenmesi ceetten müim bir adım olacaq" - dedi Meclis reisi.

Körüşüvniñ soñunda maruzacılar, yarın, avgust 9 künü, Kyivde "American house"da keçirilecek "Qırım Aqşamınıñ" ilânını yaptılar. Tedbirde meşur diplomatlar ve siyasetçilerniñ çıqışlarınen, qırımtatar sanatçıları azırlağan kontsertniñ keçirilmesi beklenile.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.