Haberler

Yaşlar ile subet 30 ilk yaz ayı 2017 senesi

 

Qırımtatar Milli meclisniñ reisi Refat Çubarov Kyivde qırımtatar yaşları ile körüşüv keçirdi. Körüşüvge kelgen gençlerniñ ekseriyetini şeerniñ aliy oquv yurtlarında tasil alğan talebeler teşkil etti.

"Qırım Evi"nde olıp keçken subetniñ başında Refat Çubarov, Ukrayina Anayasasınıñ Qırım Muhtar Cumhuriyeti aqqında bölügine kirsetilecek deñişmelernen bağlı malümat berdi ve bu hususta Ukrayina sıñırları içinde milli-territorial cumhuriyetni mutlaqa meydanğa ketirmege kerek olğanını qayd etti.

Bunıñnen beraber Meclis reisi, Anayasa komissiyasınıñ nasıl işlegenini ve Ukrayina Yuqarı Şurasında bu mevzu boyunca rey berüvden evel peyda olacaq mürekkep ceryanlar aqqında añlattı. Subetniñ ekinci qısmında iştirakçiler sual ve muzakerelerge keçtiler. Yaşlar bir çoq mevzunı meraq etip, Aqyar şeerniñ statusı, saylavnıñ hususiyetleri, tasil meseleleri, temsilci organlarnıñ sayısı ve ilâhre. Milli Meclisniñ reisi aveslenip, bütün suallerge cevap bermege areket etti. Eki saat qadar devam etken körüşüvniñ soñunda Refat Çubarov yaşlarğa sıcaq ve samimiy subet içün teşekkür bildirip, oquvlarında muvafaqiyetler tiledi.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.