Haberler

Oraza bayramı ve Milli Bayraq künü 27 ilk yaz ayı 2017 senesi
Oraza bayramnıñ ekinci kününde Kyivde em bayram merasimi, em de Milli Bayraq kününe bağışlanğan miting olıp keçti. Tedbirler Qırımtatar Milli Meclisi ve Qırım ve Aqyar şeeri musulmanları dini idaresi ile bir sıra cemaat teşkilâtlarnıñ qoltutuvınen kerçekleşti. 
 
Sabadan Kyivdeki Sergi Merkezinde (Vystavkovyi Tsentr) keçirilgen Oraza bayramına kelgen musafirler biri birini hayırlamağa imkân bulıp, faalciler tarafından azırlanğan ziyafetke qoşuldılar. Meclis reisi Refat Çubarov ve Qırım müftisi Ayder Rustemov ile sanağa çıqqan cemaat teşkilâtlarnıñ yetekçileri bayramda toplanğan vatandaşlarımıznı hayırladılar ve eyi tileklerni seslendirdler. Soñra musafirlerniñ ögüne çıqqan balalar şiirler oqup, diniy mevzularda öz bilgilerini numayış ettiler. Bayramnıñ devamında sport musabaqaları ve balalar içün çeşitli oyunlar keçirildi.
 
Üyleden soñra bir sıra yaş aktivistler öz avtomobillerine qırımtatar milli bayraqlarını taqıp, bayram meydanından merkezge doğru areket ettiler. Bir buçuq saat devamında Kyiv şeerni boylap, Hreşçatik soqağınıñ başına kelgen avto-yürüşniñ iştirakçileri şu yerde başlağan cayav yürüşke qoşuldılar. Müstaqillik meydanına qadar cayav ketken vatandaşlar qollarında bayraqlar tutaraq, yüksek sesnen "Millet! Vetan! Qırım!", "Millet! Bayraq! Qırım!" ve "Qırım - bu Ukrayina!" degen şiarlarnı tekrarladılar.
 
Cayav yürüşniñ devamında Kyivniñ Mustaqillik meydanında Milli Bayraq kününe bağışlanğan miting başladı. Mitingte çıqışta bulunğan Milli Meclisniñ reisi Refat Çubarov, Qırımda yaşağan semetdeşlerimizge seslenip, olarğa sıcaq selâmlarnı yolladı ve eñ qısqa vaqıtta halqnıñ biri-birine qavuşıp birleşecegi aqta umüt bildirdi. Bunıñnen beraber, "Eki bayraq - bir devlet" - degen Refat Çubarov, dünya boyunca Ukrayin elçiliklerinde köterilgen qırımtatar milli bayraqları sebebinden Ukrayin devleti, halqı ve ükümetine teşekkür bildirdi. Qırımnıñ mutlaqa azat etilecegini qayd etken Meclis reisi, yarımadanıñ kesen-kes Qırımtatar muhtar cumhuriyeti olacağını beyan etti. Qonuşmasınıñ devamında o, ayırca, 1917-ncı senesinde olıp keçken Birinci Qurultaydan berli dalğalanğan altın tamğalı kök bayraqnıñ, artıq iç bir vaqıt endirilmeycegini ve yerge tüşmeycegini ayttı.
 
 
 
 
 
 
 
 
 
 
 
 
 

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.