Haberler

Elçiler içün iftar 22 ilk yaz ayı 2017 senesi

İyün 21 künü Kyiv şeerinde Qırımtatar Milli Meclisi ve Qırım musulmanları dini idaresi tarafından elçiler ve ecnebiy diplomatalar içün teşkil etilgen iftar aqşamı olıp keçti. Tedbirge hususan, musulman devletleri, G20 azaları ile ukrain ve qırımtatar halqlarınen qaviy dostluq bağları olğan memleketlerniñ temsilcileri davet etildi. Merasimge, ayrıca, halqara teşkilâtları ve ukrayin devlet adamları da qoşuldılar.

Merasimniñ başında aliy musafirlerge seslengen Ukraina halq deputatı ve Ukrayina Prezidenti yanında qırımtatar halqınıñ işlerinden mesül Mustafa Cemilev, öz çıqışında teşrif buyurğan aliy musafirlerge, olar temsil etken devletlerniñ ükümetlerine ve halqlarına teşekkür bildirdi. O qayd etkenine köre, dost olğan bu musulman memleketler tarafından, halqara seviyede ve Birleşken Milletler Teşkilâtında qırımtatarlarğa ve umumen Ukrayinağa berilgen destek ğayet yüksek qıymet taşımaqta.

Mustafa Cemilevden soñra söz alğan Ukrayina halq deputatı ve Qırımtatar Milli Meclisniñ reisi Refat Çubarov ise Qırımnıñ işğalinden sebep, aqraba ve dostlardan uzaq qalıp, ğurbette yaşamağa mecbur olğan qırımtatarlarnıñ böyle ciddiy imtiandan keçerken ne qadar büyük acılar iss etkenlerini añlattı. Aynı zamanda, dost memleketlerniñ qol tutqanları ve yaqın alâqa köstergenleri, Qırımnıñ qaytarıluvı davasında isse qoşqanları ve qırımtatar halqnıñ acısını paylaşqanlarından ötrü özlerine soñ derece müteşekkir olğanını da bildirdi. Nevbetteki Ramazan ayını, tantanalı iftarlarnı ve bayramlarnı beraberlikte Qırımda qayd etüv aqqında qaviy ümüt beslegenini de açıqladı.

İftar vaqıtı yaqınlaşqanınen Qırım ve Aqyar şeeri musulmanları diniy idaresi yolbaşçısı Ayder Rustemov dua ve niyazdan evel, qısqa bir çıqışta bulunıp, bir-eki cümlenen Qırımdaki vaziyetke dair öz mulâazalırnen paylaştı. Müftiy aytqanına köre, bugünki künde qırımtatar halqı "ekstremizm" ve "terrorizm" kibi esassız ve çirkin sıfatlarnen qabaatlanıp, bir çeşit yañı sürgünlik yaşamaqta. Lâkin buña baqmadan, pervasız qalmağan dünya memleketlerniñ desteginen bu ağır vaqıtlarnı aşıp, ğalebe ve muvafaqiyetke irişilecegine inanğanını bildirdi.

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.