Haberler

Elvida, safdaşımız İbraim bey ... 12 arman ayı 2014 senesi

11-avgustta Moskvadan kederli haber keldi – anda bir qaç aftadan berli havflı ameliyattan soñ tedaviylev – reabilitatsiyada bulunğan belli cemaatçımız ve sabıq devlet memurı İbraim Enver oğlu Mamutov 51 yaşında vefat etti.

İbraim bey 1963 senesi 28-iyülde Andijanda, Bağçasaray rayonından mında sürgünlikke oğrağan qorantada doğdı. Onıñ mektep ve institutaki oquv ve ilk faaliyet yılları Samarqandda keçti. İqtisadiyatçı zenaatı boyunca aliy tasilli mütehassıs oldı. Halqımıznıñ Vatanğa kütleviy avdeti başlanğanda, o da Qırımğa köçüp, şirket tesis ete ve muvafaqiyetli çalışa.

Milliy işlerden çette turmağan, qırımcılıq müiti üküm sürgen qorantada büyügen İbraim bey Vatanına qaytqan soñ daima qurumlarımız etrafında bulundı, olarnıñ qararlarını becerip keldi. Özü de dörtünci ve beşinci Milliy Qurultaylarnıñ delegatı saylandı, olarnıñ çalışmalarına öz degerli issesini qoştı.

Salmaqlı iqtisadiy, teşkiliy, idarecilik tecribe saibi olğan İ. Mamutov Milliy Meclis tevsiyesinen devlet işine keçe. O, bir qaç yıl sanayı, naqliye ve alâqa veziriniñ, soñra devamlı vaqıt Ukraina prezidenti Qırımda daimiy Temsilcisiniñ muavini vazifelerinde çalıştı.

İbraim bey nasıl devlet müessisede çalışmasın, öz millet mensüpligini unutmadı, gizlemedi, aksine – ğurur ile kösterip turdı. Oña muracaat etken insanlarğa qolundan kelgen yardımda bulunmağa tırıştı. 2007 senesi qırım neşirlerinden birisiniñ diger sualleri sırasında, "Sformuliruyte osnovnıye tezisı krımskotatarsköy natsionalnoy idei", buyurğan teklifini izaatlaraq:

"Dumayu, çto krımskotatarskiy narod vsegda büdet stremitsâ k sozdaniyu natsionalnoy avtonomii v sostave nezavisimogo demokratiçeskogo gosudarstva Ukraina. Doljnı bıt çetko sformulirovanı printsipı i metodı realizatsii dannoy tseli. Pervoye – eto zakonnost deystviy, vtoroye – nenasiliye, priçem krımskiye tatarı imeyüt bogatıye demokratiçeskiye traditsii v zaşçitu svoih prav, tretye – obrazovaniye, i çetvertoye – informirovaniye predstaviteley drugih narodov, jivuşçih s nami vmeste, poçemu mı tem ili inım obrazom tak postupayem", dedi.

Safdaşımız İbraim bey daima hatıramızda aqiqiy vatanperver, milletsever, samimiy ve külerüzlü insan, becerikli, muvafaqiyetli ve degerli şahıs, faal, israrlı, bilgili ve milliy ğayege sadıq cemaatçı olaraq qalacaqtır.

VI Milliy Qurultay delegatları, Milliy Meclis, Teftiş Komissiya, Merkeziy saylav Komissiyanıñ azaları İbraim Enver oğlu Mamutov vefat etkeni munasebetinen onıñ anasına, ömür arqadaşına, üç evlâdına, tatası ve ağalarına em de diger yaqınlarına teren taziye bildireler, sabır ve baş sağlığı tileyler.


Alla rahmet eylesin.


 

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.