Haberler

Rabbimiz aydın ve bahlı künlerni yaqınlaştırsın! 28 oraq ayı 2014 senesi

 

 

Sayğılı vatandaşlar!
Qıymetli qırım musulmanları!

Mına, Ramazan ayında, adet ve qanunğa çevirilgen, ruhumız ve vucudımıznınnıñ temizleyici nevbetteki sınavı da keçmişte qaldı. Bu sefer o yaznıñ eñ sıcaq, yarığı eñ uzun, iftarnen temçitniñ arası eñ qısqa olğan künlerge rastkeldi.

Böyle astronomik al daa bir qaç yıl sürecek. İnşalla, bu sınavlarnıñ episi irademizni, imanımıznı tek qaviyleştirir ve taqdirimizniñ emiri olğan mürekkep devir milletimizge yollağan soravlardan muvafaqiyetli keçmek içün küç-taqat bağışlar.

Başından çoq müsibetler keçirgen halqımız pıtraqlı vaqıtlarda özüni nasıl alıp barmaqnı yahşı bilgen. Onıñ asırlar boyu toplağan nesiller feraseti birlik-beraberlik metanetine qoşulıp, oña qarşı yapılğan açıq ya da gizli, işğalci akimiyet ya da propaganda qurbanı olğan diger millet vekilleri, cail ya da oqumış insanlar tarafından yapılğan areketlerniñ ögüni almaq, zulum ve basqığa baqmadan inkişaf etmek, evlâd östürmek ve doğru terbiyelemek oğrunda bozulmaz-yarılmaz temel oldı.

Oraza Bayram küneşi yüz yıllarnen evelsi kibi künümizni aydınlatır eken, onıñ ümüt bergen nurları ve sıcağı epimizge hayırlı olsun ve, şu cümleden, dualar tesirinen büyük horluqlardan keçken milletimiz Vatan saibi olacaq acayıp zamannı yaqınlaştırsın!

Epimiz, qadim ve qaraman tarih yaşap kelgen yekâne millet vekilleri olğan haq ve adaletli duyğularımız aynı böyle haq ve adaletli arzu-niyetlerimizni kerçekleştirmesine hızmet etsin!

Er bir qorantada baht-seadet, barlıq-muabbetlik, şeñ-şeramet üküm sürsin! Alla-Taalâ tutqan orazalarımıznı qabul etip, qırım müminlerine, Oña samimiycesine itaat etken, Onıñ emirinen iş tutqan bütün insanlarğa qaviy sağlıq-selâmetlik bağışlasın!

 

Milliy Meclis azaları
 

Sayt HCİ (IRI) www.iri.org ve "Fond rozvitku Krimu" Hayriye Teşkilâtınıñ www.cdf.org.ua qoltutuvında açıldı. Adres: Qırım MC, Simferopol ş., Şmidt soqağı, 2; Tel.: 27-35-26  © 2011 QTMM.ORG All rights reserved.